Ísland virðir ákvörðun Alþjóðlega sakamáladómstólsins
Setja bókamerki
Íslensk stjórnvöld virða ákvörðun Alþjóðlega sakamáladómstólsins (ICC) um að fara fram á handtökuskipan á hendur ísraelskum ráðherrum og leiðtoga Hamas, að sögn utanríkisráðherra.
Eins og mbl.is greindi frá í gær hefur ICC farið fram á handtökuskipan á hendur Benjamín Netanjahú, forsætisráðherra Ísraels, Yoav Gallant, varnarmálaráðherra Ísraels, og Yahya Sinwar, leiðtoga Hamas á Gasa.
Krafan er lögð fram á grundvelli stríðsglæpa og glæpa gegn mannkyninu vegna hryðjuverkanna 7. október og átakanna sem hafa geisað á Gasa eftir það.
„Ísland er og hefur um árabil verið ötull bakhjarl Alþjóðlega sakamáladómstólsins og íslensk stjórnvöld styðja dómstólinn í sínu hlutverki sínu hlutverki við að sporna gegn refsileysi fyrir alþjóðaglæpi,“ segir Þórdís Kolbrún R. Gylfadóttir utanríkisráðherra í samtali við mbl.is, spurð út í ákvörðun ICC.
„Mikilvægasta hagsmunamál Íslands“
Þórdís segir að stuðningur Íslands við ICC sé í samræmi við „mikilvægasta hagsmunamál Íslands“ sem sé að tryggja að alþjóðalög, en ekki hnefaréttur, ráði úrslitum í samskiptum ríkja.
„Við höfum haldið því til haga og munum gera áfram, að alþjóðalögum fylgi ekki eingöngu heilög réttindi heldur heilagar skyldur,“ segir ráðherra.
„Íslensk stjórnvöld taka beiðni saksóknarans mjög alvarlega enda eru um alvarlega ásakanir að ræða,“ bætir hún við.
Svarar ekki hvort Netanjahú yrði handtekinn á Íslandi
Aftur á móti hefur hefur dómstóllinn enn ekki tekið ákvörðun um hvort handtökuskipanin verði samþykkt. Þórdís segir að það gæti tekið nokkrar vikur.
„Við erum með alþjóðakerfi og Alþjóðlegi sakamáladómstóllinn er hluti af því kerfi. Þegar upp koma vísbendingar eða rökstuddur grunur um að alþjóðalög séu brotin, treystum við að það fari í þann farveg sem það fer í.“
Er þetta tilefni til að telja það trúlegra að Ísrael sé að fremja glæpi?
„Íslensk stjórnvöld hafa ekki sömu forsendur – gögn og annað – og þau sem hafa legið yfir þessu undanfarnar vikur og mánuði. Sú ákvörðun sem þarna er tekin er gríðarlega stór og söguleg. Það gerir Alþjóðlegi sakamáladómstóllinn ekki nema að vel athuguðu máli. Þannig að það sýnir að það er ástæða fyrir því að þetta er gert. Það fer síðan eftir því hver næstu skref verða, hvaða ákvörðun verður tekin,“ svarar ráðherra.
Ef ICC samþykkir þessa beiðni, myndi Netanjahú vera handtekinn ef hann kæmi til Íslands?
„Við erum ekki komin á þann stað núna. Við tökum það bara fyrir eins og það birtist,“ segir hún og undirstrikar aftur að Ísland hafi verið ötull bakhjarl ICC. „[Við] viljum að [ICC] fúnkeri í þessu alþjóðakerfi sem við eigum undir að allt haldi. Við höfum hingað til stutt við hann og fylgt því sem þaðan kemur.“
Fórnarlömbin sett á sama stall
Helstu stuðningsmenn Ísraels, Bandaríkjamenn þar helst, hafa sagt að það sé ekki réttlætanlegt að setja Hamas-hryðjuverkamenn og kjörna ráðherra í Ísrael á sama stall.
Þórdís túlkar ákvörðun ICC á annan hátt. Dómstóllinn sé með þessu að setja alþjóðalög og fórnarlömbin átakanna á sama stall.
„Þegar ég horfi á þessa ákvörðun og þá vinnu sem dómstóllinn er búinn að vinna, horfir það þannig við mér að það sé verið að setja alþjóðalögin á sama stalla, það sé verið að setja fórnarlömbin á sama stall. Ég get ekki séð að með þessari ákvörðun sé verið að setja hryðjuverkasamtökin Hamas og lýðræðislega kjörin stjórnvöld í Ísrael á sama stall.
„En það er verið að segja: Alþjóðalögin gilda sama hvað. Og ef að það er þannig að verið er að brjóta mannúðarlög og alþjóðalög, sem við höfum fengið nokkuð skýra frásagnir um, þá er fólkið sem verður fyrir því sett á sama stall.“
Þjálfun á dýnum og vopnuð í hermi
Lykt staðfest af neysluvatni og lækkað ph-gildi
„Mjög sátt og í takti við það sem við reiknuðum með“
Strætó tekur u-beygju
Áformin samræmast stefnu Viðreisnar
Áburðarverksmiðja föl fyrir 190 milljónir
„Ekki hægt að hækka skatta og þvo sér síðan um hendur“
Íslenskar bækur í gervigreind Meta