„Ólíðandi“ að öryggisgæsla Bjarna sé á Alþingi

Andrés Ingi Jónsson, þingmaður Pírata, lýsti yfir óánægju sinni á því að óeinkennisklæddir sérsveitarmenn, sem ætlað er að tryggja öryggi Bjarna Benediktssonar forsætisráðherra, væru á vappinu um ganga Alþingis.

„Ég hef rætt á fundum forsætisnefndar hversu ólíðandi það er að lífverðir forsætisráðherra sé á stjákli innan þinghússins. Alþingi er friðheilagt. Það er óþolandi og ekki til sóma að sérsveitamaður lögreglunnar sé hér í hliðarsal meðan Alþingi situr að störfum. Ég fer fram á það að forseti losi Alþingi við þessa starfsmenn valdstjórnarinnar núna strax,“ sagði Andrés.

Heyrðist þá í fáeinum þingmönnum segja „heyr heyr,“ í kjölfar ræðu Andrésar.

„Hvaða kjaftæði er þetta“

Birgir Ármannsson, forseti Alþingis, sagði að hann hefði heyrt þessar athugasemdir Andrésar í forsætisnefnd en „jafnan brugðist við með þeim hætti að það sé þannig að öryggisatriði verði að ákveða í samráði við lögreglu…“ sagði Birgir en þá hrópaði Andrés á sama tíma og Birgir var að tala og spurði hvaða hætta væri í salnum.

Kallaði þá annar þingmaður: „Hvaða kjaftæði er þetta.“

Birgir náði svo að klára erindi sitt.

„Og lögregla þarf að meta öryggisráðstafanir sem þarf að gera vegna öryggis ráðamanna.“

• 1 blogg um fréttina

Bloggað um fréttina

• Þorsteinn H. Gunnarsson: Eftir forsetakosningarnar sjá menn draug í hverju horni, eða hvað?