Segir samkeppnina frá útlöndum mikla

Kjarnafæði Norðlenska hefur á undanförnum vikum átt í viðræðum við fjárfesta um að auka hlutafé félagsins. Rekstur félagsins gekk vel í fyrra, en fjármagnskostnaður þess var þungur sökum mikilla skulda. Viðræðurnar enduðu þó með því að Kaupfélag Skagfirðinga (KS) festi kaup á öllu hlutafé félagsins sl. föstudag. Samkvæmt heimildum Morgunblaðsins er kaupverðið um 2,5 milljarðar króna.

Frétt af mbl.is

„Sannarlega stór aðili að kaupa annan stóran“

Kaupin eru ekki háð samþykki Samkeppniseftirlitsins, þar sem nýleg breyting á búvörulögum veitir afurðastöðvum undanþágu frá samkeppnislögum. Deilt var um lagasetninguna á meðan málið var til meðferðar á Alþingi í vetur, en hagsmunasamtök í verslun og þjónustu voru þau sem helst deildu á breytingarnar.

Kaupin eru aftur á móti háð samþykki hluthafa. Nú þegar liggur fyrir að bræðurnir Eiður og Hreinn Gunnlaugssynir, sem eiga um 56% hlut í Kjarnafæði Norðlenska, munu selja sinn hlut. Eiður segir í samtali við Morgunblaðið í dag að þeir bræður séu komnir á aldur.

Frétt af mbl.is

Deila um áhrif kaupa KS – „Úr lausu lofti gripið“

Búsæld, sem er í eigu um 500 bænda, á 43% hlut í félaginu en þar mun hver og einn hluthafi taka ákvörðun. Einn þeirra er Þórarinn Ingi Pétursson, formaður atvinnuveganefndar Alþingis og þingmaður Framsóknarflokksins. Hann átti fund með þeim Eiði og Hreini sl. föstudag áður en tilkynnt var um kaupin.

Frétt af mbl.is

Kaupfélag Skagfirðinga kaupir Kjarnafæði Norðlenska hf.

Sigurjón Rafnsson, aðstoðarkaupfélagsstjóri KS, segir í aðsendri grein í Morgunblaðinu í dag að viðskiptin feli í sér tækifæri til að gera betur fyrir íslenska bændur og neytendur. Hann bendir á að íslenskur landbúnaður eigi í samkeppni við innfluttar landbúnaðarafurðir sem séu verulega niðurgreiddar og framleiddar hjá erlendum risafyrirtækjum þar sem framleiðslutækin eru nýtt allan sólarhringinn alla daga ársins.

Frétt af mbl.is

„Þetta lá fyrir allan tímann“

Lesa má meira um málið í Morgunblaðinu í dag.