Innlent | mbl | 19.8.2024 | 13:50

Verkefnið að flytja „lifandi kjöt“ á milli staða

Þegar svæðisskipulag höfuðborgarsvæðisins sem nú er í gildi var samþykkt var gert ráð fyrir minni fólksfjölgun á svæðinu en nú hefur orðið raunin. Samkomulagið byggir á þeirri forsendu að öll sveitarfélögin sem koma að skipulaginu þurfa að samþykkja það ef eitt þeirra ákveður að færa út svokölluð vaxtarmörk sín.

Einar Þorsteinsson er spurður að því í nýjasta þætti Spursmála hvort hann telji það koma Reykjavikurborg við ef bæjarstjórnir Hafnarfjarðar eða Garðabæjar, svo dæmi sé tekið, vilja víkka út byggðina innan sinna bæjarmarka.

Segir Einar að hann sé að vissu leyti á þeirri skoðun.

Frétt af mbl.is

Segist hugsi yfir kostnaði við borgarlínu

Orðaskiptin þar um má sjá í spilaranum hér að ofan en einnig í textanum sem hér fylgir að neðan.

„Já, að ákveðnu leyti og leyfðu mér að útskýra það. Við erum núna vonandi að fara að undirrita nýjan samgöngusáttmála sem er eitt stærsta fjárfestingaverkefni, innviðafjárfestingaverkefni Íslandssögunnar.“

Frétt af mbl.is

Tölva hjá borginni í sumarleyfi til 1. des

Vill kerfi sem fúnkerar

Þið eruð að fara að endurskoða það og það er allt í klessu.

„Bíddu, rólegur. Það gengur út á það að þróa höfuðborgarsvæðið þannig að við séum ekki öll föst í umferðinni. Hvað tala menn mikið um að við séum föst í umferðinni. Þetta er óþolandi og við erum að vaxa og ef við ætlum að ná að vera með höfuðborgarsvæði sem er fúnkerandi þá verðum við að byggja skynsamlega á skynsamlegum stöðum. Gera alvöru borgarlínu eða hraðstrætó, eða hvað sem við viljum kalla það. Þetta er aðalllega vagn sem flytur lifandi kjöt milli borgarhluta og fúnkerar. Hraðar en einkabílarnir.“

Vill ekki mörkin langt upp til fjalla

Segir hann að bæjarstjórar höfuðborgarsvæðisins deili sýn á þetta verkefni.

„Þess vegna gleður það mig að það sé sýn bæjarstjóranna á höfuðborgarsvæðinu að fara í þessa framkvæmd. En þá megum við ekki gleyma því að það verður að vera kúnnahópur sem hefur aðgengi að þessum almenningssamgöngum og hjólastígum og öllu þessu og búa til þennan kúnnahóp stangast eiginlega á, sú sýn sem bæjarstjórarnir eru fylgjandi stangast á við það að útfæra vaxtamörkin mjög langt upp til fjalla. Af því að borgarlínan nær ekki þangað.“

Þannig að þið viljið bara byggja allt ofan í borgarlínunni þannig að fólk geti labbað inn og út úr strætó, nánast úr innkeyrslunni heima hjá sér.

Fólk vill komast hratt á milli staða

„Já, þetta er dálítið svona, já. En horfðu bara á London og París. Hvar byggðist borgin þéttast upp?“

Það búa 12 milljónir manna í London?

„Bíddu, ég er bara að taka bjánalegt dæmi. Í kringum árnar, af hverju því þar flaut fólkið bara á bátum og komst hratt á milli staða. Allar borgir, hægri menn, vinstri menn, miðju menn, sem eru að glíma við vöxt fara í svona prógram og það er mjög gleðilegt að það sé samstaða um þessa sýn hér á höfuðborgarsvæðinu. Að því sögðu þá vil ég hraða húsnæðisuppbyggingu alstaðar í öllum sveitarfélögum af því að þetta er sameiginlegt verkefni að tryggja fólki húsnæðisöryggi.

Vill halda í unga fólkið með borgarlínunni

Segir hann markmiðið að gera höfuðborgarsvæðið alþjóðlega samkeppnishæft.

„Og þannig að með vaxtarmörkin, ég er alveg til í svoleiðis samtal en það má ekki glata þeirri sýn að borgin og höfuðborgarsvæðið sé svæði sem sé samkeppnishæft á alþjóðavettvangi, að unga fólkið okkar vilji frekar búa hérna, að það vilji frekar verja lífi sínu hér á Íslandi og komist hratt á milli staða en sé ekki fast í umferð hálfa ævina.“