Innlent | Morgunblaðið | 14.9.2024 | 11:29

Molar hagfelldir Vinstri grænum

„Þetta eru molar sem eru hagfelldir Vinstri grænum. Þetta eru ekki molar sem ég tel að sé samstaða um í ríkisstjórnarflokkunum. Það er þegar komið í ljós því forsætisráðherra tjáði sig með þeim hætti á fundinum hjá okkur að honum hugnaðist það ekki eða honum fyndist þetta sérkennileg tillaga til hækkunar á gjaldtöku í sjávarútvegi.“

Þetta segir Heiðrún Lind Marteinsdóttir, framkvæmdastjóri Samtaka fyrirtækja í sjávarútvegi, þegar hún er innt eftir því hvort hún telji líkur á að frumvarp matvælaráðherra um breytingar á gjaldtöku í sjávarútvegi nái fram að ganga. Heiðrún er gestur Spursmála að þessu sinni.

Vilji ráðherrans ráði för

Heiðrún Lind er gestur Spursmála að þessu sinni. Bendir hún á að fyrirætlanir um heildarendurskoðun á löggjöf um fiskveiðar hafi nú þegar runnið út í sandinn en sú löggjöf var sögð eiga að byggjast á verkefninu Auðlindin okkar, sem Svandís Svavarsdóttir, þáverandi ráðherra málaflokksins, hratt úr vör á sínum tíma. Það hafi í raun verið yfirvarp að löggjöf á grunni þeirrar vinnu myndi endurspregla víðtækt samráð og aðkomu ólíkra aðila.

„[...] á endanum er þetta auðvitað hin pólitíska ábyrgð ráðherra og hann er ekki að fara að leggja fram frumvörp sem eru í andstöðu við hans eigin stefnu. Þannig að eðli máls samkvæmt verða frumvörpin alltaf VG-leg. Þannig að núna er búið að skræla af þessu frumvarpi sem áttu að vera heildarlög um sjávarútveg með fullt af krúsídúllum í, niður í þessi fáu frumvörp sem eru íraun bara gömul hjartans mál VG,“ segir Heiðrún Lind.

Viðtalið við Heiðrúnu Lind má sjá og heyra í heild sinni í spilaranum hér fyrir neðan. Auk hennar eru mætt á svæðið þau Vilhjálmur Birgisson, formaður Starfsgreinasambandsins og Þorbjörg Gunnlaugsdóttir, alþingismaður fyrir Viðreisn.