Píratar vilja ekki fleiri baðlón
Stefán E. Stefánsson
Setja bókamerki
Tengdar fréttir
Spursmál
Píratar vilja stemma stigu við verðbólgunni með því að draga úr eldsneytisinnflutningi og halda aftur af fjárfestingum erlendis. Þá telur nýr leiðtogi Pírata enga þörf fyrir fleiri baðlón í landinu enda þurfi að breyta samsetningu ferðamannahópsins sem hingað sækir.
Lenya Rún Taha Karim er nýr leiðtogi Pírata og verður í oddvitasæti flokksins í Reykjavík fyrir komandi þingkosningar. Í Spursmálum útskýrir hún þær fjölbreyttu aðgerðir sem hún telur að stjórnvöld geti gripið til í því skyni að draga úr verðbólgu í hagkerfinu.
Orðaskiptin þar um má sjá í spilaranum hér að ofan en þau eru einnig rakin í textanum hér að neðan.
Margar aðgerðir sem hið opinbera geti gripið til
Verðbólgan er sannarlega að gera okkur skráveifu og háir vextir. Hvað viljið þið að stjórnvöld geri til þess að draga úr þeim vanda svo við rekjum umræðuna áfram í þá átt?
„Út frá mínu sjónarhorni og sjónarhorni unga fólksins þá er rosalega mikil vöntun á húsnæði. Og til lengri tíma litið þá er skorturinn á húsnæðismarkaðnum að ýta undir verðbólguna. Hvað varðar gjaldeyrismálin, það verður líka að huga að gjaldeyrismálunum og það verður til dæmis að draga úr innflutningi á kolefniseldsneyti. Það verður líka að passa að við séum ekki að fara yfir um í fjárfestingu á erlendum fyrirtækjum eða erlendis yfir höfuð. Vera með sjálfbærari ferðamannastefnu sem er betri fyrir þá ferðamenn sem koma hingað, svona vandaðri ferðamenn en massatúrismann sem hefur skapast hér.“
Eru þetta aðgerðir til að draga úr verðbólgu?
„Já, ég myndi segja að allt þetta hafi áhrif á verðbólgu. Að draga úr verðbólgu er ekki bara ein aðgerð. Þetta er samansafn og samspil margra mismunandi aðgerða og nú er ég bara að tala um hvað hið opinbera getur gert, hvað ríkið getur gert, ríkisstjórnin.“
Hvað getur ríkisstjórnin gert til þess að breyta samsetningu ferðamanna?
„Með því að auka hvata til að draga úr þessum massatúrisma sem hefur skapast akkúrat núna.“
Ekki fleiri baðlón
Hvaða hvatar eru það?
„Ég held að baðlón, að byggja upp baðlón sé ekki lausnin núna. Ég held að með því að auka framboð á húsnæði sem við erum nú þegar að leigja út til ferðamanna á Airbnb. Þeir geta alveg farið á hótel og haft þetta skammtímahúsnæði sem er notað, skilur þú, fyrir ferðamenn.“
Bíddu, þú ert að tala um hvatana. Viltu þá að stjórnvöld banni einkaaðilum að reisa baðlón?
„Nei, Guð. Ég vil ekki banna neitt. Píratar tala ekki fyrir baðlónum, bönnum, afsakið. Ég held að það sem við höfum verið að leggja púðrið okkar í sé ekki nákvæmlega það sem skipti máli núna. Við þurfum að vanda til verka þegar kemur að því að taka á móti ferðamönnum.“
Þú segir að stjórnvöld eigi að beita sér með þessum hætti. Nú hefur þú setið á þingi, þú ferð inn á þetta þing eftir þessar kosningar vænti ég. Hvað telur þú að stjórnvöld geti gert til þess að hafa áhrif á þetta? Þú segir að stjórnvöld eigi að hafa áhrif að breyta samsetningu ferðamannanna. Hvernig er það gert? Er það gert með því að banna baðlón? Hvernig er það gert?
Of margar íbúðir leigðar út gegnum Airbnb
„Fyrsta aðgerðin væri að minnka framboð á Airbnb-húsnæði sem er á markaði akkúrat núna með því að minnka hvata fyrir það að kaupa húsnæði, kaupa upp húsnæði á húsnæðismarkaði og leigja það út til skamms tíma.“
Hvað eru þetta margar eignir sem eru í skammtímaleigu gegnum Airbnb?
„Ég er bara ekki með töluna á því.“
Ertu þá viss um að þetta sé vandamál?
„Já, já, já. Þetta hefur alveg verið í umræðunni lengi. Það er sýnt í könnunum. Það hefur komið út í skýrslum. Ég er samt ekki með blaðsíðuna né heitið á skýrslunni. Þetta er bara vitað í samfélaginu.“
Ókei. Þú vilt þá fækka Airbnb-íbúðum til þess að fækka budget-túristum sem fara í íbúðirnar. Það kann að vera. Hvaða fleiri aðgerðir sjáið þið fyrir ykkur í þessu. Að draga úr massatúrisma í landinu?
„Það er hægt að grípa til margra mismunandi lítilla aðgerða frekar en að banna einhverjum að koma eða eitthvað svoleiðis.“
Túristafyrirtækin vandamál
Getur þú nefnt einhver dæmi um þessar litlu aðgerðir því þú segir að stjórnvöld eigi að gera það? Ég hef bara áhuga á að kjósendur myndu vita hvað þið mynduð gera til þess að reyna að breyta þessu.
„Já. Það er líka með þessi túristafyrirtæki sem koma hingað til Íslands. Annað erlent fólk sem er að leiða þessi fyrirtæki, annað erlent vinnuafl sem er að koma hingað og er að taka fólk í túr um Ísland og hvetja fólk til Íslands. Það væri hægt að hvetja það fólk sem er nú þegar á Íslandi til þess að taka þetta að sér. Þá yrðu þetta kannski vandaðir túrar. Það yrði þá kannski aðeins fækkun á þessum massatúrisma ef það er ekki það mikið framboð á þeim túristafyrirtækjum sem eru að taka fólk í alls konar ferðir.“
Vilt þú hækka virðisaukaskattinn á ferðaþjónustuna?
„Veistu. Ég hef bara ekki myndað mér skoðun á því. Ég ætla bara að vera alveg hreinskilin með það.“
Viðtalið við Lenyu Rún má sjá og heyra í heild sinni í spilaranum hér að neðan:
Tengdar fréttir
Spursmál
Ekki hægt að framfylgja lögum og stefnu án úrræða
Guðmundur um ræðuna: „Fall er fararheill“
Enski boltinn styrkir stöðuna
Yfirgripsmikið mál en rannsókn miðar vel
/frimg/1/55/69/1556936.jpg)
/frimg/1/55/70/1557095.jpg)
Hæstiréttur þyngir dóm í kynferðisbrotamáli
Áformin samræmast stefnu Viðreisnar
„Tímaspursmál hvenær eitthvað alvarlegt gerist“
The Atlantic birtir Signal-samskiptin