Fjármál Lúðvíks komu í veg fyrir ráðherrastól

Lúðvík Bergvinsson.

Fjármál Lúðvíks Bergvinssonar, þingmanns Samfylkingarinnar, eru höfuðástæða þess að hann kom ekki til greina sem ráðherra í ríkisstjórn Samfylkingarinnar og Vinstri grænna, samkvæmt heimildum Morgunblaðsins.

Orðrómur hafði verið uppi um að Lúðvík myndi setjast í stól dómsmálaráðherra. Heimildir herma að Lúðvík hafi skuldað langt umfram eignir í tveimur félögum, Miðkletti ehf. og B 33 ehf., en félögin eiga 2.000 fermetra skrifstofuhúsnæði í Borgartúni 33.

Lúðvík hefur sagt sig úr stjórnum félaganna, sem hann átti helmingshlut í, en hann seldi þann hlut til viðskiptafélaga síns um áramótin.

Hann segist fylgjandi því að forsætisnefnd Alþingis setji þinginu almennar reglur um upplýsingagjöf þingmanna um eignir og hagsmunatengsl og kannast ekki við að slíkar upplýsingar um hann séu óljósar og lítt aðgengilegar fyrir almenning.

Lúðvík kveðst hafa verið þátttakandi í viðskiptalífinu frá 1996, jafnframt því að gegna þingmennsku og segir viðskipti samræmast þingstörfum.