Innlent | Kosningar | mbl | 24.2.2009 | 12:50 | Uppfært 20.12.2009 23:46

Höskuldur í háskaför

Össur Skarphéðinsson, utanríkisráðherra, segist ekki skilja hver hafi komið þeirri flugu í hausinn á Höskuldi Þórhallssyni, þingmanni Framsóknarflokksins, að skýrsla nefndar á vegum Evrópusambandsins um regluverk evrópskra seðlabanka komi seðlabankafrumvarpi ríkisstjórnarinnar eitthvað við.

Segir Össur, að Höskuldur sé lagður af stað í háskalega för og það sé illt afspurnar fyrir Framsóknarflokkinn að hann sé lagstur í vörn fyrir seðlabankastjóra.

Samkvæmt erindisbréfi nefndarinnar varða verkefni hennar ekki hæfniskröfur seðlabankastjóra eða hvort ákvarðanir eru teknar af bankastjórum eða peningamálastefnunefnd.

Málið olli miklum titringi á stjórnarheimilinu í gær og reynt var að ná samningum við forsætisnefnd alþingis um að frumvarpið yrði tekið fyrir þótt það hefði ekki verið samþykkt úr viðskiptanefnd.