Meirihlutaviðræður hafnar á Dalvík

J - listinn mun ekki kæra úrskurð kjörnefndar sýslumannsins á Akureyri um niðurstöðu sveitarstjórnarkosninga í Dalvíkurbyggð hinn 29. maí sl. J – listinn hefur nú hafið formlegar meirihlutaviðræður við A – listann, Byggðalistann og við það miðað að Svanfríður Jónasdóttir, oddviti J lista, verði áfram bæjarstjóri í Dalvíkurbyggð og Kristján E Hjartarson oddviti A lista verði formaður bæjarráðs. Þetta kemur fram í tilkynningu frá J-listanum.

J - listinn er óháð framboð, ekki borinn fram af stjórnmálaflokki á landsvísu og trúnaður listans er eingöngu bundinn hagsmunum Dalvíkurbyggðar og íbúa sveitarfélagsins.

„Það er mat þeirra sem skipa J- listann að það séu hagsmunir sveitarfélagsins að óvissu ljúki sem fyrst og að bæjarstjórn með starfhæfan meirihluta taki til starfa svo fljótt sem verða má og vinni að þeim brýnu verkefnum sem fyrir liggja.

Það er ljóst að ýmsum finnst úrskurður kjörnefndar sýslumanns orka tvímælis og undrast að lögin skuli vera svo óljós að kjörstjórn Dalvíkurbyggðar og kjörnefnd sýslumanns komist að algerlega öndverðri niðurstöðu. J – listinn skorar því á Alþingi að taka lög nr. 5/1998 um kosningar til sveitarstjórna til endurskoðunar með það að markmiði að skýra ákvæði laganna um þau álitaefni er varða gild og ógild atkvæði og einnig þá ferla sem taka eiga við ef úrslit kosninga eru kærð og úrskurðað er um niðurstöðu," segir í fréttatilkynningu frá J-listanum.

• 1 blogg um fréttina

Bloggað um fréttina

• Björn Birgisson: Atkvæði háð geðþótta kjörstjórna