Íbúahreyfingin harmar vinnubrögð meirihlutans

Á fundi bæjarstjórnar Mosfellsbæjar í gær  bannaði forseti bæjarstjórnar og oddviti VG áheyranda á vegum Íbúahreyfingarinnar í Mosfellsbæ að hljóðrita fundinn.  Forsetinn sagðist ekki þurfa að rökstyðja þá ákvörðun sína en hljóðritun var leyfð á fundi fyrr í júní, að því er segir í ályktun frá Íbúahreyfingunni sem harmar vinnubrögð meirihlutans í bæjarstjórn.

Íbúahreyfingin í Mosfellsbæ var með á dagskrá fundarins að ræða pólitíska fréttatilkynningu sem samin var af VG og Sjálfstæðismönnum eftir kosningar og send út í nafni bæjarins til allra fjölmiðla, allra starfsmanna Mosfellsbæjar auk fjölda íbúa, en  þar voru hafðar uppi pólitískar yfirlýsingar og rangfærslur  um afstöðu Íbúahreyfingarinnar til samstarfs.  Fréttatilkynningin var send út af kynningarfulltrúa Mosfellsbæjar sem yfirlýsing frá bæjarfélaginu en ekki hinu pólitísku flokkum að beiðni Haraldar Sverrissonar bæjarstjóra  sem jafnframt er oddviti Sjálfstæðismanna í bæjarstjórn.

Íbúahreyfingin í Mosfellsbæ gerði athugasemd við að starfsmanni bæjarins væri falið að sinna pólitísku erindi stjórnmálaflokka og að ekki eru skýrar línur milli pólitísks flokkastarfs sitjandi meirihluta í bæjarstjórn og stjórnsýslunnar.  Farið var fram á að send yrði út leiðrétting til þeirra fjölmiðla, íbúa og starfsmanna sem fengu hina pólitísku yfirlýsingu í hendur frá bænum, en við þeirri beiðni hefur ekki orðið.

Íbúahreyfingin í Mosfellsbæ harmar slík vinnubrögð og lýsir furðu sinni á þeirri órökstuddu ákvörðun forseta bæjarstjórnar að banna hljóðritun bæjarstjórnarfundar sem á að vera öllum bæjarbúum opinn og aðgengilegur," segir enn fremur í ályktun frá Íbúahreyfingunni.

• 1 blogg um fréttina

Bloggað um fréttina

• Arnþór Helgason: Vítaverð vinnubrögð forseta bæjarstjórnar