Fréttaskýring: Aðeins þrír koma af landsbyggðinni

Nokkuð fjölbreyttur hópur fólks var kjörinn til að sitja á stjórnlagaþingi, en sláandi er að aðeins 3 af 25 fulltrúum eru búsettir utan höfuðborgarsvæðisins. Fulltrúar á þinginu eru á aldrinum 24-70 ára, en stærsti aldurshópurinn er á aldrinum 60-70 ára.

Á kjörskrá voru samtals 232.374, en 83.531 greiddi atkvæði eða 35,95%. Heildarfjöldi ógildra atkvæða var 1.196 eða 1,4%.

Samkvæmt lögum um stjórnlagaþing má kynjamunur ekki vera meiri en 40%, en niðurstaðan varð sú að konur eru 40% þingfulltrúa og karlar 60%. Ekki kemur því til þess að þingfulltrúum verði fjölgað til að jafna kynjahlutfallið.

Ef hægt er að tala um einhvern einn sigurvegara í kosningunum þá er það Þorvaldur Gylfason prófessor en 7.192 settu hann í fyrsta sæti sem er meira en helmingi meira en næsti maður fékk, en það var Salvör Nordal, forstöðumaður Siðfræðistofnunar.

Þorvaldur og Salvör eru bæði starfsmenn Háskóla Íslands, en samtals náðu fimm háskólakennarar kjöri. Mikill meirihluti fulltrúa er með háskólamenntun af einhverju tagi.

Aðeins þrír fulltrúar búa á landsbyggðinni, þ.e. Akureyringarnir Dögg Harðardóttir og Erlingur Sigurðarson og Þingeyingurinn Ari Teitsson. Hugsanlega má flokka Lýð Árnason lækni sem landsbyggðarmann, en hann bjó til skamms tíma á Vestfjörðum.

Íris Lind næst því að ná kjöri

Yngsti fulltrúinn á stjórnlagaþinginu er Ástrós Gunnlaugsdóttir sem varð 24 ára í haust. Freyja Haraldsdóttir er jafngömul. Elstur er hins vegar Ómar Ragnarson, en hann varð sjötugur á árinu.

Íris Lind Sæmundsdóttir lögfræðingur var næst því að ná kjöri á stjórnlagaþingið, en síðastur inn var Lýður Árnason. Lögin um stjórnlagaþing gera ekki ráð fyrir neinum varamönnum. Ef einhver forfallast verða þingfulltrúar einfaldlega færri. Landskjörstjórn kemur saman á morgun þar sem gengið verður frá kjörbréfum til þingfulltrúa og er þeim sem náðu kjöri boðið að vera viðstaddir.

Eins og kunnugt er tók talsvert langan tíma að telja, m.a. vegna þess að seðlar sem voru ógildir að hluta voru um 10 þúsund. Það var ekki bara landskjörstjórn sem sá um að tryggja að rétt væri talið því sérstakir menn gerðu sjálfstæða athugun á gæðum talningar. Jóhann Malmquist sagðist vera mjög ánægður með útkomuna. Hann sagði engan vafa leika á því að talningarvélarnar hefðu aukið nákvæmni talningarinnar. Útkoman hefði ekki orðið eins nákvæm ef talið hefði verið í höndunum, en hætta á mistökum við talningu eykst þegar frambjóðendur eru svona margir. Þeir voru 522. Frambjóðendur máttu fylgjast með talningu, en mjög fáir nýttu sér það.

Stjórnlagaþingið kemur saman í febrúar og reiknað er með að það starfi í tvo mánuði. Verkefni þess er að endurskoða stjórnarskrána. Samkvæmt lögunum á þingið sérstaklega að taka til umfjöllunar eftirfarandi: Undirstöður íslenskrar stjórnskipunar og helstu grunnhugtök hennar, skipan löggjafarvalds og framkvæmdavalds og valdmörk þeirra, hlutverk og stöðu forseta, sjálfstæði dómstóla og eftirlit þeirra með öðrum handhöfum ríkisvalds, ákvæði um kosningar og kjördæmaskipan, lýðræðislega þátttöku almennings, framsal ríkisvalds til alþjóðastofnana og meðferð utanríkismála og umhverfismál, þar á meðal um eignarhald og nýtingu náttúruauðlinda.

1. Þorvaldur Gylfason

Er prófessor í hagfræði í Háskóla Íslands. Hefur ritað nítján bækur og á annað hundrað ritgerða og bókarkafla auk 700 blaðagreina. Hann lauk doktorsprófi í Princeton og hefur starfað við kennslu, rannsóknir og ráðgjöf víða um heim.

2. Salvör Nordal

Er forstöðumaður Siðfræðistofnunar Háskóla Íslands og menntuð í heimspeki. Er einn höfunda siðfræðihluta skýrslu rannsóknarnefndar Alþingis og hefur tekið virkan þátt í umræðu um orsakir og afleiðingar bankahrunsins.

3. Ómar Ragnarsson

Stundaði nám í lagadeild HÍ 1960-1964 og tók atvinnuflugmannspróf 1967. Hefur leikið í leikhúsum frá 1953 og er starfandi skemmtikraftur. Fréttamaður og dagskrárgerðarmaður í sjónvarpi frá 1969. Sjálfstæð kvikmyndagerð frá 2001.

4. Andrés Magnússon

Er læknir, með doktorspróf og hefur verið prófessor við íslenska og erlenda háskóla. Hefur unnið öll helstu verkamannastörf til sjós og lands, verkað fisk, starfað við innflutning, þróunarhjálp, á barnaheimilum og kennt jóga.

5. Pétur Gunnlaugsson

Embættispróf í lögfræði úr lagadeild Háskóla Íslands 1973. Stundaði nám í heimspeki og sögu í Háskóla Íslands. Er með lögmannsréttindi og er sjálfstætt starfandi lögmaður. Stjórnarformaður Útvarps Sögu og starfar þar sem útvarpsmaður.

6. Þorkell Helgason

Nam stærðfræði í Göttingen, München og við MIT, doktorspróf þaðan 1971. Hefur verið prófessor við Háskóla Íslands, aðstoðarmaður heilbrigðisráðherra, ráðuneytisstjóri, orkumálastjóri og stjórnarformaður Sinfóníuhljómsveitar Íslands.

7. Ari Teitsson

B.Sc.-próf í búvísindum frá Hvanneyri 1973 og sauðfjárbóndi frá sama ári. Héraðsráðunautur og mjólkureftirlitsmaður 1973-1995. Formaður Bændasamtaka Íslands 1995-2004. Stjórnarformaður Sparisjóðs Suður-Þingeyinga frá árinu 1990.

8. Illugi Jökulsson

Hefur starfað við blaðamennsku og margvísleg ritstörf, skrifað bækur, greinar, viðtöl og pistla. Illugi hefur meðal annars ritstýrt dagblaði og tveimur tímaritum. Hann hefur einnig unnið við dagskrárgerð í útvarpi og sjónvarpi.

9. Freyja Haraldsdóttir

Hefur lokið BA-námi í þroskaþjálfafræði og stundar nú meistaranám í fötlunarfræði við HÍ. Hefur starfað talsvert með börnum í leik- og grunnskólum, rekur fyrirtækið Forréttindi og er varaformaður í stjórn NPA-miðstöðvarinnar.

10. Silja Bára Ómarsdóttir

MA-gráða og doktorsnám í alþjóðasamskiptum frá University of Southern California. Verkefna- og sviðsstjóri á Jafnréttisstofu 2003-2006, forstöðumaður Alþjóðamálastofnunar HÍ 2006-2008, aðjúnkt við stjórnmálafræðideild HÍ frá 2005.

11. Örn Bárður Jónsson

Nam guðfræði í Englandi, vígður djákni 1979, cand.theol. við HÍ 1984, doktorspróf frá Fuller Theological Seminary í Kaliforníu 1995, nám við Yale-háskóla 2009. Verkefnis- og fræðslustjóri Þjóðkirkjunnar 1990-1999. Prestur Neskirkju frá 1999.

12. Eiríkur Bergmann

Doktor í stjórnmálafræði, dósent og forstöðumaður Evrópufræðaseturs Háskólans á Bifröst. Höfundur fjölda bóka og fræðigreina um þjóðfélagsmál, einkum um tengsl Íslands við umheiminn. Hefur stundað kennslu og rannsóknir.

13. Dögg Harðardóttir

Er stúdent frá Menntaskólanum í Reykjavík 1985.

Lauk B.Sc. prófi í hjúkrunarfræði frá Háskóla Íslands 1992 og uppeldis- og kennslufræði frá Háskólanum á Akureyri (HA) 2000. Er í diplomanámi í heilbrigðisvísindum við HA.

14. Vilhjálmur Þorsteinsson

Stúdent af eðlisfræðisviði MH. Starfaði sem forritari, hugbúnaðarhönnuður og tæknistjóri í eigin fyrirtæki frá 1983. Verið stjórnarmaður í ýmsum upplýsingatækni- og fjarskiptafyrirtækjum hér og erlendis, m.a. stjórnarformaður í CCP frá 2006.

15. Pawel Bartoszek

Lauk meistaraprófi í stærðfræði frá Háskóla Íslands 2005. Hefur unnið sem kennari við Háskólann í Reykjavík frá 2006. Hefur ritað reglulega pistla í Fréttablaðið og unnið sem ráðgjafi, m.a. fyrir Alþingi vegna endurskoðunar kosningalaga.

16. Þórhildur Þorleifsdóttir

Með stúdentspróf frá MA. Menntuð í Englandi og Þýskalandi. Leikstjóri, leikhússtjóri LR 1996-2000. Einn af stofnendum Kvennaframboðs og Kvennalista. Varaborgarfulltrúi 1982-1990. Sat á Alþingi 1987-1991.

17. Arnfríður Guðmundsdóttir

Embættispróf í guðfræði frá HÍ 1986. Prestur frá 1987. Doktorspróf í guðfræði frá The Lutheran School of Theology í Chicago, 1996. Kennari við guðfræði- og trúarbragðafræðideild HÍ frá hausti 1996. Prófessor frá 2008.

18. Erlingur Sigurðarson

Stúdent frá MA. BA-próf í íslensku og sagnfræði og kandidatspróf frá HÍ. Nám í Bandaríkjunum fyrr og í Þýskalandi síðar. Kennari við MA í tvo áratugi, forstöðumaður Sigurhæða – Húss skáldsins í sex ár, nú lífeyrisþegi og fæst við ritstörf.

19. Inga Lind Karlsdóttir

Stúdentspróf frá Fjölbrautaskólanum í Garðabæ og nám í hagnýtri íslensku í Háskóla Íslands. Stundar núna nám í listfræði við Háskóla Íslands. Starfaði sem blaðamaður að loknu stúdentsprófi og hefur unnið við fjölmiðla í tæp 15 ár.

20. Katrín Oddsdóttir

Með MA-próf í mannréttindum frá University of London. BA í lögfræði frá Háskólanum í Reykjavík. Einnig með BA-próf í blaðamennsku frá Dublin City University á Írland. Var meðal ræðumanna á mótmælafundum á Austurvelli.

21. Guðmundur Gunnarsson

Sveinspróf í rafvirkjun. Framhaldsnám í Tækniskóla Íslands og dönskum tækniskólum. Kennarapróf frá Kennaraháskólanum. Rafvirki hjá Ísal en hjá Rafiðnaðarskólanum frá 1975. Formaður Rafiðnaðarsambands Íslands frá 1993.

22. Katrín Fjeldsted

Stúdent frá MR 1966. Lauk læknaprófi 1973. Heimilislæknir í Reykjavík frá 1980. Borgarfulltrúi í Reykjavík 1982-1994. Þingm. Reykvíkinga 1999-2003, varaþingm. 1995-1999 og 2003-2007. Form. Félags íslenskra heimilislækna 1995-1999.

23. Ástrós Gunnlaugsdóttir

Stúdentspróf frá Kvennaskólanum í Reykjavík 2006. Lauk BA-prófi í stjórnmálafræði frá HÍ 2010. Stundar meistaranám í alþjóðasamskiptum við HÍ. Lauk leiðtogaskóla NSU sem haldinn var í Færeyjum sumarið 2005.

24. Gísli Tryggvason

Talsmaður neytenda frá 2005, framkvæmdastjóri BHM 1998-2005, aðjúnkt við HR frá 2008. Lögfræðingur HÍ 1997, hdl. 1998. MBA próf með áherslu á mannauðsstjórnun HR 2004, vottaður sáttamiðlari 2008, stúdent frá Danmörku 1989.

25. Lýður Árnason

Læknir, sérmenntun í heimilislækningum. Starfað lengst af á landsbyggðinni. Handrits- og kvikmyndagerð, á nokkrar myndir að baki, heimildamyndir og leiknar. Greinaskrif og pistlar um árabil, mestmegnis um þjóðfélagsmál.