Bjarni: Trúi á stefnuna fram í rauðan dauðann

Bjarni Benediktsson, formaður Sjálfstæðisflokksins, segir einu leiðina til að bæta fylgi flokksins þá að bretta upp ermar, sækja fram og koma stefnu flokksins til skila. Stefnu sem hann segist trúa á „fram í rauðan dauðann.“

Þetta sagði Bjarni í útvarpsþættinum Sprengisandi á Bylgjunni í morgun. Bjarni var spurður út í slæmt fylgi flokksins í skoðanakönnunum en í þeirri nýjustu sem Fréttablaðið og Stöð 2 gerðu fékk flokkurinn tæplega 18% fylgi.

Bjarni sagði hreyfingar á fylginu sögulegar. Vissulega væri fylgi flokksins samkvæmt skoðanakönnunum vonbrigði.

Eina leiðin til að bregðast við væri að sækja fram og trúa á boðskapinn.

Hann sagði að flokkurinn hefði nýlega slípað stefnuna og „ég trúi á hana fram í rauðan dauðann.“

Stefnan fæli m.a. í sér að lækka skatta, efla atvinnulífið og takast á við skuldir heimilanna.

Spurður hvort þetta væri stefna sem fólk vildi, sagði Bjarni ekki hægt að fara í breytingar eingöngu til að hámarka fylgi óháð sannfæringu sinni. 

„Ég hef enga trú á því að við getum leyst vanda Landspítalans, lögreglunnar, eldri borgara og öryrkja án þess að atvinnulífið taki að blómstra að nýju.“

Hann sagði mikilvægt að fara ekki á taugum og velta fyrir sér „gylliboðum sem hljóma vel í augnablikinu“.

Umfjöllun um landsfund olli vonbrigðum

Bjarna hugnast ekki að banna verðtryggingu. Hann segir það ekki lausnina. Hins vegar þurfi að finna aðrar leiðir og endurskipuleggja húsnæðiskerfi á næstu misserum.

Spurður um landsfund flokksins og tengsl hans við fylgistap flokksins sagði Bjarni að landsfundur væri haldinn til að kjósa forystu og álykta í ýmsum málum. Það hefði tekist vel.

Hins vegar sagði hann að umfjöllun um fundinn hefði valdið sér vonbrigðum. Í henni hefðu  aukaatriði orðið að aðalatriðum. „Það mistókst að koma jákvæðum fréttum af fundinum á framfæri og ég tek það á mig.“

Hann sagðist þó ekki ætla að festast í umræðum um það sem gerðist í febrúar. Núna væru þrjár vikur til kosninga.

• 7 blogg um fréttina

Bloggað um fréttina

• Kristbjörn Árnason: Flokksfélagar í Sjálfstæðisflokknum hafa misst trúnna á stefnu flokksins
• Steindór Sigursteinsson: Sjálfstæðisflokkurinn býður ekki upp á óraunhæfar lausnir varðandi skuldavanda heimilanna.
• Ólafur Ragnarsson: "Þar er ekki nóg að trúa "
• Óðinn Þórisson: Er Sjálfstæðisflokkurinn búinn að tapa ?
• Haraldur Haraldsson: Bjarni: Trúi á stefnuna fram í rauðan dauðann/það erum við …
• Axel Jóhann Axelsson: Sameinaðir stöndum vér, sundraðir föllum vér
• S i g u r ð u r S i g u r ð a r s o n: Sjálfstæðisflokkurinn hefur stefnu, aðeins vindhanar snúast