Innlent | Kosningar | mbl | 26.4.2013 | 20:02 | Uppfært 7.11.2013 14:16

„Ábyrgðarlaust tal“

Leiðtogaumræðurnar á RÚVí kvöld. Kristinn Ingvarsson

Þorvaldur Gylfason, formaður Lýðræðisvaktarinnar segir kosningabaráttuna hafa einkennst af yfirboðum stjórnarandstöðuflokkanna og átti þar við Framsóknarflokkinn og Sjálfstæðisflokkinn. Hann segir loforð þeirra um skuldaleiðréttingar og skattaleiðréttingar vera ábyrgðarlaust tal.

Þetta sagði Þorvaldur í leiðtogaumræðum sem nú fara fram á RÚV, en þar koma fram formenn þeirra framboða sem bjóða fram á landsvísu. Kosningabaráttuna og þau loforð sem þar hafa verið gefin bar þar á góma.

Sigmundur Davíð Gunnlaugsson, formaður Framsóknarflokksins, sagði að búist hefði verið við að sótt hefði verið að flokknum þegar hann fór að bæta við sig fylgi. „Við lögðum upp með að fara í jákvæða kosningabaráttu. Við stöndum ágætlega að vígi þegar kemur að því að færa rök fyrir tillögum okkar,“ sagði Sigmundur Davíð. „Við höfum lagt fram tillögur sem hafa sannað gildi sitt.“

Guðmundur Steingrímsson, formaður Bjartrar framtíðar, sagði flokkinn ekki ætla að fara út í „rosaleg loforð eins og enn væri árið 2007.“Bjarni Harðarson, fulltrúi Regnbogans, sagðist hafa áhyggjur af sumum kosningaloforðanna og Smári McCarthy einn af kafteinum Pírata sagði að Píratar hefðu ekki haft hug á að taka þátt í „loforðaflaumi“. Þannig starfaði flokkurinn ekki.

Pétur Gunnlaugsson í Flokki heimilanna sagði að þeir sem boðuðu skattalækkanir væru þeir sömu og hefðu á stjórnartíð sinni „þanið út báknið“. Hann sagði flokk sinn vissulega vilja lækka skatta, en ein leiðin til þess væri að minnka ríkisbáknið.

Guðmundur Franklín Jónsson, formaður Hægri grænna sagði kosningabaráttuna hafa verið „mjög skemmtilega“.

Andrea Ólafsdóttir hjá Dögun sagði flokk sinn hafa rökstutt öll sín loforð. „Þetta á að lenda á bankakerfinu,“ sagði Andrea.