Sýslumanninum í Reykjavík hefur borist kæra vegna lögheimilisskráningar Sveinbjargar Birnu Sveinbjörnsdóttur, oddvita Framsóknarflokksins og flugvallarvina. Þetta staðfestir Guðmundur Sophusson, sýslumaður í Reykjavík, í samtali við mbl.is.

Kærandi er Björgvin E. Vídalín, stjórnarformaður Dögunar í Reykjavík. Fram kom í fjölmiðlum fyrr í vikunni að hann hefði í hyggju að kæra málið sem einstaklingur en málið snýst um það hvort lögheimili Sveinbjargar sé í Reykjavík eða Kópavogi. Samkvæmt lögum þurfa frambjóðendur í sveitarstjórnarkosningum að hafa lögheimili í þeim sveitarfélögum þar sem þeir bjóða sig fram.

Sveinbjörg hefur skýrt málið með þeim hætti að hún hafi verið búsett í Reykjavík en í lok síðasta árs misst leiguhúsnæði þar og fengið tímabundið húsnæði í Kópavogi. Lögheimilið hafi hins vegar verið áfram skráð í Reykjavík og nokkrum vikum fyrir kosningar hafi hún flutt það á heimili unnusta síns í borginni þar sem hún hafi þá varið ekki minni tíma en í Kópavogi. Hún liti ennfremur á sig sem Reykvíking.

Guðmundur segir að málið sé komið í farveg hjá embættinu. Þriggja manna úrskurðarnefnd lögfræðinga hafi verið skipuð í samræmi við lög til þess að fara yfir málið. Nefndin hafi fengið öll gögn varðandi málið og muni fara yfir það.

Önnur kæra vegna borgarstjórnarkosninganna í Reykjavík barst embættinu fyrir kosningar sem sneri að því að ekki hefði verið staðið rétt að vali á fulltrúum í yfirkjörstjórn í borginni. Þeir hefðu verið skipaðir en ekki kosnir. Spurður um afdrif hennar segir Guðmundur að henni hafi verið vísað frá og ekki borist aftur.

Tengdar fréttir

Sveitarstjórnarkosningar

„Framsóknarlegt að vilja bara borgarstjórastólinn“

• „Það hefur aldrei reynt á það í sögu borgarinnar“
• Ekki skýrt hvort Framsókn sé til vinstri eða hægri
• Yngsti borgarfulltrúinn: „Þetta er ákall um breytingar“
• Hafna Borgarlínu og vilja betri rekstur

» Fleiri tengdar fréttir

• 1 blogg um fréttina

Bloggað um fréttina

• Jóhann Elíasson: SMÁMUNASEMI OG VERIÐ AÐ ELTAST VIÐ EINHVERN TITTLINGASKÍT...