Hver er þessi Guðni Th.?
Hjörtur J. Guðmundsson
Setja bókamerki
Væntanlega mun Guðni Th. Jóhannesson sagnfræðingur tilkynna formlega framboð sitt til embættis forseta Íslands á fundi sem hann hefur boðað til á fimmtudaginn í Salnum í Kópavogi. Kannanir sem gerðar voru áður en ljóst þótti hvort Guðni ætlaði í framboð benda til þess að hann njóti næstmests fylgis á eftir núverandi forseta, Ólafi Ragnari Grímssyni, í könnunum þar sem þátttakendur nefndu þann einstakling sem þeir vildu í embættið.
En hver er Guðni Th. Jóhannesson? Guðni fæddist í Reykjavík 26. júní árið 1968, sonur hjónanna Margrétar Thorlacius, kennara og blaðamanns, og Jóhannesar Sæmundssonar, íþróttakennara og íþróttafulltrúa. Guðni á tvo bræður, þá Patrek, íþróttafræðing og fyrrverandi landsliðsmann í handbolta, og Jóhannes, kerfisfræðing. Faðir þeirra lést árið 1983, 42 ára að aldri, úr krabbameini og sá móðir þeirra eftirleiðis að fullu um uppeldi þeirra bræðra.
Líkt og Patrekur stundaði Guðni handbolta á uppvaxtarárunum í Garðabænum en faðir þeirra var meðal annars handboltaþjálfari. Föðuramma og -afi Guðna voru frá Patreksfirði en þaðan er nafn Patreks komið. Þess utan voru þeir bræður skírðir í kaþólskum sið en Guðni sagði í samtali við Morgunblaðið 2009 að foreldrum þeirra hefði líkað þetta dýrlinganafn. Guðni yfirgaf hins vegar kaþólsku kirkjuna í kjölfar frétta af glæpum ýmissa kaþólskra presta.
Guðni stendur í dag utan trúfélaga en sagði aðspurður í samtali við fréttavefinn Hringbraut fyrr á þessu ári að hann tryði á almætti. Þar sagði hann ennfremur: „Líður vel með mína barnatrú og mín trúarjátning er ekki lengur „credo in unum deum“ heldur mannréttindasáttmáli Sameinuðu þjóðanna: „Hver maður er borinn frjáls, jafn öðrum að virðingu og réttindum. Menn eru gæddir vitsmunum og samvisku og ber þeim að breyta bróðurlega hver við annan.““
Guðni lauk stúdentsprófi frá Menntaskólanum í Reykjavík árið 1987 og BA-gráðu í sögu og stjórnmálafræði við Warwick-háskóla í Englandi 1991. Næsta árið stundaði hann nám í þýsku við Háskólann í Bonn í Þýskalandi en lauk ekki prófi. Á árunum 1993-1994 stundaði hann nám í rússnesku við Háskóla Íslands. Árið 1997 útskrifaðist Guðni með meistaragráðu í sagnfræði frá HÍ. Tveimur árum síðar lauk hann MSt-gráðu í sögu frá Oxford-háskóla á Englandi.
Guðni var þar með ekki hættur námi en 2003 lauk hann doktorsnámi í sagnfræði frá University of London. Þau Guðni og Eliza Reid, eiginkona hans, kynntust árið 1998 þegar þau voru bæði við nám við Oxford-háskóla, en hún er frá Kanada. Þau hafa verið búsett á Íslandi frá árinu 2003 og rekur Eliza eigið ráðgjafarfyrirtæki. Sjálf er Eliza er með BA-gráðu í alþjóðasamskiptum frá Toronto-háskóla í Kanada og MSt-gráðu í nútímasögu frá Oxford-háskóla.
Guðni og Eliza búa við Tjarnarstíg á Seltjarnarnesi og eiga saman fjögur börn, þrjá syni og eina dóttur. Börnin eru Duncan Tindur (f. 2007), Donald Gunnar (f. 2009), Sæþór Peter (f. 2011) og Edda Margrét (f. 2013). Guðni á sömuleiðis dótturina Rut (f. 1994) með fyrri eiginkonu sinni, Elínu Haraldsdóttur, viðskiptafræðingi og listakonu. Rut stundar í dag nám við Háskóla Íslands.
Guðni hefur meðal annars starfað sem kennari við Háskóla Íslands, Háskólann í Reykjavík, Háskólann á Bifröst og University of London. Í dag starfar hann sem dósent í sagnfræði við Háskóla Íslands. Eftir hann liggja mikil ritverk á sviði sagnfræði, meðal annars um þorskastríðin og forsetaembættið. Hann ritaði meðal annars ævisögu Gunnars Thoroddsens, fyrrverandi forsætisráðherra, og bók um embættistíð Kristjáns Eldjárns, fyrrverandi forseta Íslands.
Konan sögð neita sök í málinu
„Barnavæðing“ menntaskólans
Nýtt alzheimerlyf fær markaðsleyfi
Ásættanlegur taprekstur BÍ
Þrír fulltrúar fara í útför páfans
Gímaldið verði rifið
„Stríðsaðgerð“ sem verði svarað af fullum þunga