„Þetta tókst, ég kaus rétt“
Setja bókamerki
Katrín Jakobsdóttir, forsætisráðherra og formaður Vinstri-grænna, greiddi atkvæði sitt í Hagaskóla fyrr í dag.
Að sögn Katrínar var valið einfalt. Helst truflaði það hana að hún gleymdi gleraugunum heima. „En þetta tókst, ég kaus rétt,“ segir Katrín í samtali við mbl.is.
Þá býst Katrín við því að kosninganóttin verði spennandi og að okkur verði haldið í spennu til morguns. Hún bendir á að í gær hafi Vinstri-græn byrjað daginn í ólíkum skoðanakönnunum í rúmlega níu prósentum og síðan farið upp í rúmlega 12 prósent.
„Mín tilfinning er að þetta verði góðar kosningar fyrr okkur. Mér finnst ég hafa fengið alveg ofboðslega góð viðbrögð,” segir Katrín og bætir við:
„Ég held allavega að mjög mörg þarna úti séu að hugsa um okkur sem valkost í dag og auðvitað vona ég bara að við fáum góða niðurstöðu.“
Skiptir máli að fólk geti rætt saman
Spurð um framhaldið segir Katrín það eðlilegt, ef ríkistjórnin heldur meirihluta, að þeir flokkar ræði þá saman. Hins vegar ef ríkisstjórnin fellur þá segir Katrín að hún myndi þá að sjálfsögðu óska lausnar fyrir ráðuneytið. Hér séu ákveðnar hefðir sem haldast í hendur.
„Við sjáum það að það er auðvitað mjög líklegt að það verði níu flokkar á þingi á morgun og það býður auðvitað upp á töluvert mörg stjórnarmynstur, þannig að ég held að þetta verði alveg heilmikið úrlausnarefni og það skiptir auðvitað máli að fólk geti rætt saman og gert eðlilegar málamiðlanir og hugað að því hvernig það myndar þá starfhæfa ríkisstjórn um sameiginleg málefni til næstu ára,“ segir Katrín.
Forsætisráðherrann elskar lakkrís
Katrín vakti miklu lukku á samfélagsmiðlum í gær þegar hún klæddist lakkrískjól í leiðtogaumræðunum í Ríkisútvarpinu.
Katrín ákvað að klæðast kjólnum í gær þar sem eiginmaður hennar hafði keypt hann henni til heilla í kosningabaráttunni.
„Og svo náttúrlega elska ég lakkrís, en það er annað mál,“ segir Katrín að lokum.
Auka aðgengi að Grindavík
Létu lofthræðsluna ekki á sig fá
„Við vöknuðum við hljóð frá sprengingum“
Rannsókn á menningarnæturmáli lokið
Hvatti kjósendur til þess að greiða ógild atkvæði
Heimildarmenn tala um hápólitískt drama
Fæðuöryggi: „Áttum mat í þrjár vikur“
Vinna hefst í dag við að reisa undirstöður