Hildur á auglýsingaskiltum á Tenerife

Sjálfstæðisflokkurinn í Reykjavík hefur tekið kosningabaráttu sína út fyrir landsteinana en flokkurinn auglýsir nú framboð sitt fyrir komandi borgarstjórnarkosningar á Tenerife, þar sem margir sólþyrstir Íslendingar leggja leið sína.

Á auglýsingaskiltum lofar Hildur Björnsdóttir, oddviti flokksins, íslenskum ferðalöngum betra veðri með því að fara í átak í gróðursetningu trjáa sem tryggja muni betri veðurskilyrði í borginni.

Í samtali við mbl.is segir Hildur að flokkurinn auglýsi einungis á flugvellinum á Tenerife en eins og mbl.is hefur greint frá lagði fjöldi Íslendinga leið sína til Tenerife yfir páskana.

Frétt af mbl.is

Íslendingar framlengja ítrekað dvöl sína erlendis

„Við mætum fólki þar sem það er statt. Margir Reykvíkingar hafa verið á ferðalagi yfir páskana þannig að við vildum óska þeim góðrar ferðar og hlökkum til að sjá þau aftur í Reykjavík,“ segir Hildur.

Gáfu birkigræðlinga

Flokkurinn virðist leggja mikið upp úr því að fleiri tré verði gróðursett í Reykjavík en í gær, sumardaginn fyrsta, gengu frambjóðendur flokksins í hús og gáfu birkigræðlinga.

„Fólk tók okkur alveg ótrúlega vel. Á sumum stöðum stoppaði maður lengi vel og leit jafnvel inn í kaffi. Sumir voru líka svo ánægðir með að fá tréð að þeir gróðursettu það á staðnum. Þannig að það var tekið vel í framtakið,“ segir Hildur.

• 2 blogg um fréttina

Bloggað um fréttina

• Jón Magnússon: Betra veður
• Örn Gunnlaugsson: Hvergi flóarfriður ?