Fylgst með reki stórrar íseyju

Kanadískir og bandarískir vísindamenn lentu á þriðjudaginn á stórri íseyju nyrst í Kanada til að koma þar fyrir gervihnattasendum í því skyni að fylgjast með reki eyjarinnar, sem nefnd er Ayles-íseyjan. Hún er 16 km löng og fimm km breið, og brotnaði frá Ellesmere-eyju, skammt frá Norður-Grænlandi í ágúst 2005.

Eyjan fannst aftur á móti ekki fyrr en seint á síðasta ári. Þegar hún brotnaði frá ísnum við Ellesmere-eyju kom það fram á jarðskjálftamælum í 250 km fjarlægð, en þá var ekki ljóst hvað hafði gerst.

Sendarnir sem settir verða upp á eynni gefa upplýsingar um rek hennar suð-vestur á bóginn, í átt til Alaska, þar sem talið er að hún geti ógnað olíuborpöllum. Af gervitunglamyndum að dæma hefur eyjuna rekið tæpa 100 km síðan hún brotnaði frá.

• 1 blogg um fréttina

Bloggað um fréttina

• Gísli Foster Hjartarson: Eyja á reki