Vísindamenn reyna að þýða söng hvalanna

Hópur ástralskra vísindamanna í háskólanum í Queensland hafa undanfarin þrjú ár unnið að því að ráða í merkingu söngs hnúfubaka en hnúfubakar eru þeir skíðishvalir, sem syngja með sérstæðustum og margbrotnustum hætti. Hafa vísindamennirnir greint á milli 34 mismunandi boðskipta milli hnúfubaka.

„Ég bjóst við, að við myndum ef til vill finna 10 mismunandi hljóð en fundum 34. Þetta er í raun breitt og margbrotið raddsvið," hefur Reutersfréttastofan eftir Rebeccu Dunlop, einum af vísindamönnunum.

Greint er frá þessum rannsóknum í tímaritinu Journal of the Acoustical Society of America. Segjast vísindamennirnir hafa greint ákveðin hljóð, sem greinilega hafi merkingu. Þannig heyrist hljóð líkt og mal þegar tarfarnir eru að gera hosur sínar grænar fyrir kúm og tiltekin hátíðnihljóð tengjast því þegar ágreiningi tarfa. Vísindamennirnir segjast einnig hafa komist að þeirri niðurstöðu, að eitt algengasta hljóðið, sem heyrist til hnúfubaka, sé þegar kýrnar eru að kalla á kálfa sína.

Rebecca Dunlop segist ekki vilja ganga svo langt að skilgreina hvalasönginn sem tungumál en margt sé þó líkt með honum og táknkerfi og samskiptum manna.

„Þetta er afar merkilegt, að sjávarspendýr, sem hafa verið aðskilin frá landdýrum um langan tíma fylgi samt sama grundvallartjáskiptakerfinu," segir hún.

• 3 blogg um fréttina

Bloggað um fréttina

• Snorri Bergz: Vísindamenn reyna að þýða...
• Gunnar Th. Gunnarsson: Kötturinn minn hefur margar raddir
• Örvar Már Marteinsson: Vísindamenn í kassa