Kínverjar vilja ekki lýðræði í Eve Online

Samkvæmt heimildum 24 stunda eru kínverskir leikmenn í Eve Online-leiknum ekki par hrifnir af því að lýðræðið hefji senn innreið sína í tölvuleikinn, sérstaklega í ljósi þess stjórnkerfis sem er ríkjandi í Kína og á lítið skylt við hina vestrænu skilgreiningu á lýðræði. Sumir kínverskir leikmenn hafa meira að segja hótað að hætta þátttöku sinni í leiknum ef lýðræðið nær fram að ganga.

Pétur Óskarsson hjá CCP er sá sem hefur hvað mest komið að því verkefni að innleiða lýðræði í hinn mikla heim Eve Online. „Spilarar fá að kjósa úr hópi frambjóðenda sem bjóða sig fram sjálfir, þeir kjósa þann sem þeim líst best, eins og í lýðræðislegum kosningum. Þeir níu atkvæðahæstu eru kosnir í ráð og það ráð mun hafa beint samband við okkur hér hjá CCP."

Fulltrúarnir eru kosnir til hálfs árs í senn og einu sinni á kjörtímabilinu ferðast þessir fulltrúar til Íslands í boði CCP, þar sem þeir funda með fulltrúum CCP um framvindu leiksins. „Í rauninni eru þeir að flokka og forgangsraða því sem þeim og spilurunum finnst vera mest áríðandi."

• 2 blogg um fréttina

Bloggað um fréttina

• Snorri Bergz: Feitu búddarnir með stæla
• Alexander Kristófer Gústafsson: Kommapakk