Skrifleg tjáning hjálpleg

Ný bandarísk rannsókn bendir til þess að það auki lífsgæði krabbameinssjúklinga að tjá sig skriflega um sjúkdóm sinn og þann ótta sem hann veldur þeim. Þetta kemur fram á fréttavef BBC.

Nancy Morgan, sem hefur sérhæft sig í meðferð sem byggir á skriflegri tjáningu, gerði rannsóknina á meðal sjúklinga í krabbameinsmeðferð í Washington DC í Bandaríkjunum. Leiddu niðurstöður hennar í ljós að um helmingur sjúklinga telur slíka meðferð hjálpa sér og þá sérstaklega yngri sjúklingar.

Greint er frá rannsókninni í tímaritinu The Oncologist en meðferðin sem um ræðir felst í því að sjúklingar gefi sér tuttugu mínútur til að skrifa um líðan sína, batahorfur ogáhrif veikindanna á líf þeirra.

Eftir nokkurra vikna meðferð sögðust 49%  þátttakenda í meðferðinni telja hana hafa breytt viðhorfi sínu til veikindanna og 38% sögðu hana hafa haft áhrif á tilfinningaleg áhrif veikindanna.

Morgan segir fyrri rannsóknir hafa leitt í ljós að það hafi engin áhrif á liðan fólks að skrifa fólk niður staðreyndir um veikindi sín. Umrædd rannsókn sýni hins vegar að það reynist mörgum sjúklingum hjálplegt að skrifa niður persónulegar hugsanir sínar og tilfinningar.

• 3 blogg um fréttina

Bloggað um fréttina

• Jóna Kolbrún Garðarsdóttir: Þetta ætti þá að gilda um aðra sjúkdóma
• Heimir Lárusson Fjeldsted: Krabbinn hristir rækilega upp í okkur.
• Snorri Bergz: Skrifleg tjáning = góð meðferð gegn sjúkdómum?