Kolaiðnaður á krossgötum

Um þessar mundir er háð hörð barátta um hina svokölluðu FutureGen-áætlun í Bandaríkjunum sem miðar að því að nýta kol sem mengunarlausan orkugjafa.

Gert er ráð fyrir að 275 MW tilraunaorkuver verði reist í Mattoon í Illinois þar sem framleitt verði vetni úr kolum og það nýtt til framleiðslu rafmagns. Koltvísýringnum verði dælt í jarðlög þar sem hann gengur í efnasamband við bergið.

Bandaríska orkumálaráðuneytið hefur nú kynnt breyttar áætlanir þar sem styrkir verði veittir til þess að reisa ný kolakynt orkuver og þróa tækni til þess að farga CO₂. Framleiðsla vetnis verði hins vegar látin lönd og leið. Formaður stjórnar FutureGen, heldur því fram að þetta muni seinka þróun aðferða til þess að geyma CO₂ í jörðu. Hann bendir á að FutureGen sé ekki starfrækt í hagnaðarskyni og þekkingin muni því nýtast kolaframleiðendum um allan heim.