Fær hvatningarverðlaunin fyrir þróun gervigreindar

„Það er augljós fengur fyrir okkur að fá menn eins og Ara aftur heim til starfa og hann uppfyllir viðmið valnefndarinnar og er verðugur handhafi hvatningarverðlauna vísinda- og tækniráðs 2008,“ sagði Geir H. Haarde forsætisráðherra, eftir að hafa veitt Ara Kristni Jónssyni verðlaunin í gær.

Verðlaunin eru ein þau helstu sem veitt eru fyrir vísindaafrek á Íslandi og nemur verðlaunaféð tveimur milljónum króna. Fimm eiga sæti í dómnefnd og barst þeim 21 tilnefning að þessu sinni.

Verðlaunin eru veitt efnilegum vísindamönnum og hlaut Ari Kristinn, sem er tölvunarfræðingur og deildarforseti tölvunarfræðideildar Háskóla Reykjavíkur, verðlaunin fyrir rannsóknir á gervigreind.

Ari Kristinn á að baki viðburðaríkan vísindaferil.

Hann lauk doktorsnámi frá Stanford-háskóla í Bandaríkjunum, einum öflugasta háskóla heims, og fjallaði í doktorsritgerð sinni um notkun gervigreindar við sjálfvirka áætlanagerð og ákvarðanatöku.

Fór fyrir þróunarteymi NASA

Ari hóf því næst störf hjá Geimferðastofnun Bandaríkjanna (NASA), þar sem hann kom að þróun á „Remote Agent“-hugbúnaðinum sem stjórnaði Deep Space One-geimfarinu í maí 1999 í „vel heppnaðri tilraun til að láta gervigreind stjórna geimfari“, eins og rakið er í umsögn dómnefndar.

Ari Kristinn fór síðan fyrir fjölmennum hópi vísindamanna hjá NASA við þróun á hugbúnaðinum MAPGEN sem var, ásamt öðrum hugbúnaði, notaður á jörðu niðri við að stjórna könnunarjeppunum Spirit og Opportunity, sem lentu á reikistjörnunni Mars 2004.

Segir í umsögninni að leiðangurinn hafi kostað um einn milljarð dollara, eða rúma 72 milljarða króna, og að það hafi verið mat þeirra sem stjórnuðu honum að MAPGEN-hugbúnaðurinn hafi aukið afköst jeppanna um 15-40%.

Ari Kristinn hefur hlotið ýmsar viðurkenningar fyrir störf sín, þ.á.m. verðlaunin „Outstanding Research Paper Award“ á alþjóðlegri gervigreindarráðstefnu árið 2000 og hjá NASA fékk hann bæði „Space Act Award“ og „NASA Administrator's Award“ fyrir MAPGEN-hugbúnaðinn.

Ari Kristinn hóf í fyrra störf hjá Háskólanum í Reykjavík og hefur síðan m.a. átt þátt í að koma á samstarfi við Kaupmannahafnarháskóla um sjálfvirka stýringu mælitækja á Grænlandi og samstarfi við Reiknistofu í Veðurfræði og fleiri um notkun á hermun og gervigreind til að meta og stýra áhrifum loftslags á framleiðslu, dreifingu og notkun orku, svo eitthvað sé nefnt.