Kengúruborgarar til bjargar jörðinni?

Ástralskur vísindamaður heldur því fram að það gæti haft jákvæð áhrif í baráttunni við losun gróðurhúsalofttegunda borði fólk kengúruborgara í stað hamborgara með nautakjöti, líkt og flestir eiga að venjast.

Hann segir að gastegundirnar sem bæði kindur og kýr losi, þegar dýrin ropa eða leysa vind, eigi stóran þátt í hlýnun jarðar. Áhrifin séu í raun mun meiri heldur en losun koltvísýrings út í andrúmsloftið.

Hann bendir á að meltingarkerfi kengúra sé byggt upp með öðrum hætti og af þeim sökum losi þær lítið af metangasi, ólíkt kindum og nautgripum, að því er fram kemur á fréttavef BBC.

Vísindamaðurinn George Wilson, sem starfar hjá Áströlsku dýrlífssamtökunum, hvetur bændur til að hefja kengúrubúskap.

Kindur og nautgripir losa um 11% af heildarlosun gróðurhúsalofttegunda Ástrala. Ýmsar tillögur hafa verið ræddar varðandi það hvernig megi taka á þessu máli.

Wilson segir lausnina mögulega liggja hjá kengúrunum. „Það bragðast mjög vel, ekki ósvipað hjartarkjöti, en bragðið er aðeins öðruvísi,“ segir hann.

• 2 blogg um fréttina

Bloggað um fréttina

• Ásgrímur Hartmannsson: Komum saman og leysum vind
• G. Tómas Gunnarsson: Skippy Burgers