Tækni & vísindi | mbl | 28.8.2008 | 10:45 | Uppfært 17:15

Félagslegir þættir hafa áhrif á heilsufar fólks

Lífslíkur Íslendinga eru með því hæsta sem gerist í heiminum. Hins vegar er bilið milli efnameiri einstaklinga og efnaminni að aukast, líkt og víðast hvar í heiminum. mbl.is/Golli

Félagslegir þættir, fremur er erfðafræðilegir, eiga þátt í því að mikill munur er á heilsufari og lífslíkum einstaklinga um allan heim. Þetta kemur fram í nýrri rannsókn Alþjóðaheilbrigðismálastofnunarinnar (WHO).

Rannsókn WHO stóð yfir í þrjú ár, en hún gekk út á að rannsaka áhrif félagslegra þátt á heilsu fólks.

Niðurstaða rannsóknarinnar er sú að „félagslegur ójöfnuður drepur fólk unnvörpum.“

Á fréttavef breska ríkisútvarpsins (BBC) kemur fram að drengur sem býr í Calton, sem úthverfi fátækra í Glasgow, mun lifa að meðaltali 28 árum skemur en drengur sem býr í Lenzie, sem er úthverfi auðugra í Glasgow.

Á sama hátt má búast við því að þeir sem búa í Hamstead-hverfinu í London lifi 11 árum lengur en þeir sem búa í St. Pancras, sem er skammt frá.

Þá kemur fram að stúlkur frá Afríkuríkinu Lesotho lifi að meðaltali 42 árum skemur en japanskar stúlkur.

Í Svíþjóð eru líkurnar á því að kona deyi af barnsförum einn á móti 17.400. Í Afganistan er hlutfallið einn á móti átta.

Sérfræðingar WHO komust að því að það sama eigi við í næstum öllum ríkjum heims, að bág kjör og heilsubrestur haldist í hendur. Varað er við því að ef ekki verði gripið í taumana nú muni ójöfnuðurinn aukast ennfrekar í heiminum.

Lífslíkur íslenskra karla er með því hæsta sem gerist í heiminum eða 79 ár. Á Indlandi eru lífslíkurnar 62 ár og 63 ár meðal þeldökkra sem búa í Washington í Bandaríkjunum, svo dæmi séu tekin.

Rannsókn WHO má skoða hér.