Varað við of mikilli aspirin-notkun

Ekki er rétt að allir sem greinst hafa með sykursýki taki aspirin reglulega til að draga úr hættunni á hjartaáfalli, samkvæmt niðurstöðum nýrrar skoskrar rannsóknar. Algengt er að læknar ráðleggi slíkum sjúklingum að taka aspirin reglulega en það getur valdið truflunum á sýrustigi maga og leitt til blæðinga. Þetta kemur fram á fréttavef BBC.

Greint er frá rannsókninni í The British Medical Journal en hún stóð yfir í sjö ár og náði til 1.300 fullorðinna einstaklinga. Niðurstaða hennar er sú að einstaklingar, sem ekki hafa sýnt nein merki um hjartveiki, hafi ekkert gagn af lyfinu. Sérfræðingarnir sem unnu að rannsókninni, ráðleggja hins vegar þeim, sem sýnt hafi einkenni hjartveiki, að taka lyfið áfram að staðaldri. 

Samkvæmt niðurstöðu rannsóknarinnar er engin munur á tíðni hjartaáfalla á meðal fólks, yfir fertugu sem greint hefur verið með sykursýki  1 og 2 en ekki sýnt merki um hjartveiki, eftir því hvort það tekur aspirin að staðaldri eða ekki. 

Jill Belch, sem stjórnaði rannsókninni sem unnin var við háskólann í Dundee, bendir á að notkun aspirins sé ein aðalorsök flestra innlagna á sjúkrahús vegna magablæðinga. „Við höfum farið aðeins frammúr okkur hvað aspirin varðar,” segir hún. „Við þurfum að endurmeta fyrirbyggjandi notkun okkar á lyfinu. “ Hún áréttar þó að þeir sem hafi greinst hjartveikir eða fengið hjartaáfall áður hafi óumdeilanlega gagn af lyfinu. 

Rannsóknir á áhrifum aspirins á hjartveika hafa sýnt fram á að regluleg notkun lyfsins dregur út líkum á áföllum um allt að 25%.

Tíðni hjartaáfalla er töluvert hæri meðal sykursýkissjúklinga en þeirra sem ekki þjást af sjúkdómnum og á  undanförnum árum hefur færst í aukanaað læknar hafi ráðlagt sykursýkissjúklingum, sem ekki hafi sýnt merki hjartveiki, að taka lyfið. 

• 1 blogg um fréttina

Bloggað um fréttina

• ViceRoy: Samheitalyf?