Tækni & vísindi | mbl | 3.11.2008 | 14:36

Þungaðar konur dragi úr kaffidrykkju

Vísindamenn hafa komist að því að það eru tengls á milli kaffidrykkju og fæðingarþyngdar barna. Reuters

Breska matvælastofnunin (FSA) ráðleggur verðandi mæðrum að draga úr allri neyslu koffeins. Stofnunin leggur til að þær drekki ekki meira en samsvarar tveimur kaffibollum eða fjórum bollum af tei á dag.

Stofnunin ráðleggur nú þunguðum konum að innbyrða ekki meira en sem nemur 200 mg af koffeini á dag. Þetta er þriðjungslækkun frá því sem var, en áður hafði stofnunin miðað við 300 mg.

Fram kemur á fréttavef breska ríkisútvarpsins að þetta sé gert í kjölfar niðurstaðna vísindamanna við háskólana í Leicester og Leeds. Þeir komust að því að það væru tengsl á milli koffeindrykkju og fæðingarþyngdar barna, þ.e. barna sem eru mjög létt við fæðingu.

Rannsóknin verður birt í læknaritinu British Medical Journal í þessari viku.

Börn sem eru mjög létt við fæðingu eru líklegri en önnur börn að glíma við ýmis heilsufarsvandamál, s.s. hjartasjúkdóma og sykursýki, síðar meir.

Fram kemur á fréttavef BBC að þetta þýði að barnshafandi konur eigi í mesta lagi að drekka tvo venjulega kaffibolla á dag.