Tetris sagður draga úr áhrifum áfallastreitu

Það að spila tölvuleikinn Tetris getur dregið úr áhrifum áfallastreitu. Þessu halda breskir vísindamenn fram.

Sjálfboðaliðar tóku þátt í rannsókn vísindamannanna sem sýndu þeim óhugnanlegar myndir. Sjálfboðaliðarnir voru síðan látnir spila Tetris um hálftíma síðar. Þetta kemur fram í vísindaritinu PLoS One.

Að sögn vísindamannanna urðu færri endurlit (e. flashback) hjá þeim sem spiluðu leikinn. Ástæðan sé sú að leikurinn kom í veg fyrir að minningarnar næðu að skjóta rótum. Þetta kemur fram á fréttavef breska ríkisútvarpsins.

Annar sérfræðingur heldur því hins vegar fram að engin rannsókn geti haft sömu áhrif á fólk og alvarlegur atburður sem gerist í raun og veru.

Áfallastreituröskun (PTSD) tengist oft þeirri lífsreynslu sem fólk verður fyrir á átakasvæðum. Það getur haft áhrif á þá sem hafa lent í skyndilegum og átakalegum atburði.

Endurlit einkenna áfallastreituröskun, þ.e. viðkomandi upplifir skyndilega eitthvað hræðilegt sem hann sá, heyrði eða finnur jafnvel einhverja lykt sem tengist atburðinum.

Rannsóknin, sem vísindamenn við Oxford-háskóla stóðu að, byggir á þeirri meginreglu að það sé mögulegt að breyta því hvernig heilinn býr til minningar um nokkrum klukkustundum eftir að atburður gerðist.

Alls tóku 40 heilbrigðir sjálfboðaliðar þátt í rannsókninni. Vísindamennirnir sýndu þeim kvikmynd þar sem m.a. mátti sjá fólk sem hafði orðið fyrir alvarlegum meiðslum.

Helmingur sjálfboðaliðanna fengu að spila leikinn á meðan hinn helmingurinn gerði ekkert að sýningu lokinni.

Fram kemur að endurlit hjá þeim sem spiluðu Tetris hafi verið áberandi færri en hjá þeim sem gerðu ekkert.

• 1 blogg um fréttina

Bloggað um fréttina

• Rosaleg: En hvað með Bubbles?