Með allt á þurru í ástamálum

Því fylgir mikil eftirvænting og spenna þegar fólk er að fara á stefnumót við einhvern eða einhverja, sem því líst vel á. Ósjaldan veit það samt fátt um viðkomandi og þá er gott að eiga DateCheck að. Þar er hægt að fletta upp flestu um þann eða þá, sem hitta skal.

Það er bandaríska fyrirtækið Intelius, sem býr yfir risastórum gagnabanka, sem boðar þessa nýju tækni.

„Hann pabbi minn var naskur við að sjá út vonbiðlana mína en DateCheck slær honum alveg við,“ sagði Katherine Herman, framleiðslustjóri Intelius, en til að nýta sér tæknina þarf fólk að vera með Apple-snjallsíma.

Með honum má sjá hvort viðkomandi er á sakaskrá eða í hjónabandi og ef allt lítur vel út, er rétt að skipta yfir í New Worth-kerfið. Þar má sjá í hve stóru húsi viðkomandi býr og hvað það kostar.