Hakkarar hagnýta eldgosið

Netskúrkar ýmsir hafa hagnýtt sér eldgosið í Eyjafjallajökli til skemmdarverka, að því er segir í fréttabréfi Spamfighter. Þeir hagnýta sér forvitni og fróðleiksfýsn tölvunotenda nú þegar eldgosið er ofarlega í hugum margra - ekki síst strandaglópa á flugvöllum heimsins.

Fólk leitar upplýsinga og fróðleiks á netinu í gegnum leitarvélar. Leitarorð sem tengjast eldgosinu og trruflunum á flugi hafa verið mjög vinsæl. Skúrkar þessir nýta sér tækni sem kennd er við svartan hatt (Black Hat Search Engine Optimization) til að skjóta inn slóðum að spellvirkjasíðum í leitarniðurstöður.

Vilji fólk sjá íslenskar eldgosamyndir og slái inn í leitina t.d. „Iceland volcano picture“, sem mun vera algengasta leitarbeiðnin um þessar mundir að sögn fréttabréfsins, inniheldur önnur síðan í leitarniðurstöðum skaðlegt efni. 

Þar er tölvunotendum beint að vefsíðum sem sýna falskar öryggisviðvaranir og reyna að blekkja fólk til að hlaða niður eða sækja í tölvur sínar veiruvarnarforrit sem í raun eru allt annað.

Starfsmenn leitarvélar Google hafa orðið varir við aukningu á fölskum veiruviðvörunum og spilliforritum á vefnum. Falskar veiruviðvaranir eru um 15% af spilliforritum á vefnum. Þeir benda einnig á að tölvuárásir undir yfirskyni falsaðra veiruviðvarana séu um 60% af skaðlegum forritum sem finnast á lénum sem innihalda vinsælustu leitarorðin.

Það þykir ógnvænleg staðreynd að eftir að eldgos hófst í Eyjafjallajökli skili vefleit að orðum á borð við „Iceland Volcano“ (Ísland eldfjall) og „Iceland Volcanic Eruption“ (Ísland eldgos) fjölda af hökkuðum vefsíðum.

Tölvunotendum er bent á að besta leiðin til að forðast árásir með ýmsum hryllings- og spillihugbúnaði sé að smella aldrei á og samþykkja óþekktar vefslóðir. Þrátt fyrir ítrekaðar viðvaranir  þar að lútandi verði fólk stöðugt að fórnarlömbum eigin forvitni og þurfi að gjalda fyrir það.

• 1 blogg um fréttina

Bloggað um fréttina

• Heimir Lárusson Fjeldsted: Makkinn sleppur