Apple tekur „risastökk“með nýjum iPhone

Apple afhjúpaði í dag endurnýjaða útgáfu af hinum gríðarvinsæla iPhone farsíma. Steve Jobs segir að nýja útgáfan sé „stærsta stökk" sem fyrirtækið hefur tekið síðan upprunalegi iPhone síminn var settur á markað. Þessi fjórða útgáfa iPhone er 24% þynnri en síðasta útgáfa á undan. Skjárinn er sagður betri en áður og í honum er myndavél sem getur tekið myndbönd.

Aðdáendur Apple bíða þess eflaust spenntir að síminn komi í almenna sölu. Gagnrýnendur segja hinsvegar að vinsældir símans verði líklega fyrir áhrifum frá því hversu stranga stjórn Apple vill hafa yfir því hvað notendur geta og geta ekki gert við tækjabúnaðinn.   

Í símanum eru rúmlega 100 tækninýjungar, þ.á.m. myndbandsupptökuvél sem snýr fram og er hugsuð til þess að notandinn geti setið fjarfundi með lifandi mynd í gegnum símann. Þá verður myndavélin betri, batteríið um 40% öflugra og töluvert hærri upplausn á skjánum, sú besta sem þekkst hefur á farsímum að sögn Jobs.

Síminn mun kosta á bilinu 199 til 299 Bandaríkjadali og fer til að byrja með aðeins á markað í Bandaríkjunum, Bretlandi, Þýskalandi, Frakklandi og Japan þann 24. júní.