Samstarf um krabbameinsrannsóknir

Háskóli Íslands og Harvard School of Public Health hafa endurnýjað samstarfssamning um sameiginlegt vísindastarf sem felur í sér samvinnu í rannsóknum og kennslu ásamt þjálfun og leiðbeiningu ungra vísindamanna.

Samningurinn er milli milli Miðstöðvar í lýðheilsuvísindum við Háskóla Íslands og Faraldsfræðideildar Harvard Háskóla, samkvæmt fréttatilkynningu.

Hornsteinn samstarfsins er rannsókn á krabbameini í blöðruhálskirtli sem hefur ekki verið rannsakað jafnítarlega og mörg álíka algeng krabbamein.

Rannsóknarverkefni Miðstöðvar í lýðheilsuvísindum og Faraldsfræðideildar Harvard School of Public Health á krabbameini í blöðruhálskirtli byggja á einstökum íslenskum efniviði frá Hjartavernd og Krabbameinsskrá, samkvæmt fréttatilkynningu frá HÍ.

Miðstöð í lýðheilsuvísindum vinnur nú að rannsóknum í samvinnu við Faraldsfræðideild Harvard School of Public Health, Krabbameinsfélag Íslands, Hjartavernd og Landspítala Háskólasjúkrahús á blöðruhálskrabbameini.

Rannsóknirnar snúa að áhættuþáttum sem og forspárþáttum um framvindu sjúkdómsins, t.d. um áhrif mataræðis ásamt streitu og svefnvenja á framþróun sjúkdómsins. Tveir doktorsnemar í lýðheilsuvísindum við Háskóla Íslands og tveir nýdoktorar vinna við þessar rannsóknir í samvinnu við fræðimenn allra ofantalinna stofnanna.

Rannsóknirnar eru meðal annars studdar af Rannsóknarsjóði Íslands og Krabbameinsfélaginu Framför, en Framför hefur það að markmiði efla og styðja við rannsóknir og fræðslu á krabbameini í blöðruhálskirtli.

• 1 blogg um fréttina

Bloggað um fréttina

• Hecademus: Styrkjum gott málefni