Vísindamenn óttast nýja bakteríu

Ný baktería, sem er ónæm fyrir öflugustu sýklalyfjum, hefur fundist í breskum sjúkrahúsum. Breska ríkisútvarpið BBC hefur eftir læknum, að bakterían hafi fundist í sjúklingum, sem fóru til Indlands og Pakistans og gengust þar undir lýtaaðgerðir.  

BBC segir að bakteríurnar framleiði ensím sem nefnist NDM-1. Um 50 tilfelli hafa verið skráð í Bretlandi til þessa en sérfræðingar óttast að bakterían muni breiðast út um heiminn. Segja sérfræðingarnir að auka þurfi eftirlit og framleiða ný lyf. 

Að sögn BBC getur NDM-1 verið í mismunandi bakteríum, svo sem E-coli, og gerir þær ónæmar fyrir einum öflugustu sýklalyfjunum, sem nefnast carbapenems. Óttast sérfræðingar að NDM-1 berist í aðrar bakteríur, sem þegar eru ónæmar fyrir mörgum sýklalyfjum. 

Þetta gæti valdið hættulegum sýkingum, sem myndu berast hratt milli fólks og yrði nánast ómögulegt að meðhöndla.  Smit hefur þegar borist á milli sjúklinga í sjúkrahúsum í Bretlandi.

Að minnsta kosti ein NDM-1 sýking, sem sérfræðingar rannsökuðu, var ónæm fyrir öllum þekktum sýklalyfjum.  

Svipaðar sýkingar hafa sést í Bandaríkjunum,  Kanada, Ástralíu og Hollandi og sérfræðingar segja að NDM-1 gæti orðið að alheimsvandamáli. 

Salmonellubakteríur.

• 2 blogg um fréttina

Bloggað um fréttina

• Arnar Pálsson: Frétt af gerð 2
• Heimir Lárusson Fjeldsted: Sitt er hvað sr. Jón og Sigga skrína