Evrópsk lögregla til atlögu við ólöglegt niðurhal

Lögregla víðsvegar um Evrópu hefur gert húsleitir hjá tæplega fimmtíu veffyrirtækjum sem eru grunuð um að bjóða upp á ólöglegt niðurhal. Meðal annars hefur verið leitað hjá PRQ í Svíþjóð en talið er að fyrirtækið visti Pirate Bay vefinn og WikiLeaks. Er þetta ein umfangsmesta aðgerð sem lögregla í Evrópu hefur farið gegn ólöglegu niðurhali.

Alls var farið inn í 48 fyrirtæki víðsvegar um Evrópu.  Þar af voru sjö í Svíþjóð en aðgerðunum var stjórnað af lögreglu í Belgíu og Svíþjóð sem segir þær niðurstaða tveggja ára rannsóknar á starfsemi þessara fyrirtækja.

BBC hefur eftir sænska saksóknaraembættinu að rannsóknin beindist gegn neti sem nefnist „The Scene" og býður upp á niðurhal á kvikmyndum áður en þær koma á dvd mynddiska.

Búið er að handtaka fjóra í tengslum við málið í Svíþjóð auk þess sem lagt hefur verið hald á fjölda netþjóna og tölva. Segir lögreglan að aðgerðin tengist á engan hátt WikiLeaks. 

Sænskur dómstóll fann í apríl í fyrra fjóra forsvarsmenn Pirate Bay seka um að hvetja til höfundarréttarlagabrota með því að reka netsíðuna. Þeir voru dæmdir í árs skilorðsbundið fangelsi og til að greiða 30 milljónir sænskra króna í bætur til kvikmynda- og tónlistarframleiðenda.

• 2 blogg um fréttina

Bloggað um fréttina

• Árni Viðar Björgvinsson: "tengist á engan hátt WikiLeaks" - HAH!
• Durtur: Vita þeir í alvöru ekki betur?