Sprengdir - í tölvuleik

Stærsti stjórn­ar­and­stöðuflokk­ur­inn á Spáni, Alþýðufylk­ing­in (PP), sem er miðju-hægri­flokk­ur, hef­ur valdið upp­námi með tölvu­leik á vefsíðu flokks­ins. Í leikn­um geta þátt­tak­end­ur m.a. sprengt flug­vél­ar með ólög­leg­um inn­flytj­end­um.

 Leik­ur­inn var fjar­lægður af síðunni eft­ir fá­ein­ar klukku­stund­ir og sögðu full­trú­ar PP að höf­und­ur leiks­ins hefði ekki farið fylli­lega að fyr­ir­mæl­um um gerð hans.  Ætl­un­in hefði verið að gefa færi á að sprengja glæpa­gengi sem taka að sér að flytja ólög­lega inn­flytj­end­ur til Spán­ar. En and­stæðing­ar flokks­ins segja að með leikn­um hafi PP sýnt sitt rétta and­lit: hneigð til út­lend­inga­hat­urs.

 Í leikn­um er formaður flokks­deild­ar­inn­ar í Katalón­íu, Alicia Sanchez-Camacho, sýnd­ur ríðandi á hvít­um máfi er nefn­ist Pepe. Hún er kölluð Alicia Croft og ljóst að þannig er minnt á hetj­una Lara Croft í þekkt­um tölvu­leik, Tomb Rai­der. Þátt­tak­end­ur fá stig ef þeim tekst að láta máfinn sprengja flug­vél með ólög­leg­um inn­flytj­end­um eða tákn­mynd­ir sem katalónsk­ir þjóðern­is­sinn­ar nota en þeir vilja, and­stætt PP, fullt sjálf­stæði Katalón­íu.

Mörg þúsund manns skráðu sig í leik­inn þegar hann var kynnt­ur á þriðju­dag­inn og vefsíðan hrundi, að sögn dag­blaðsins El Pais. 

• 1 blogg um frétt­ina

Bloggað um frétt­ina

• Davíð Stef­áns­son: Þrosk­isti.