Geimfar stendur undir nafni

Enginn manngerður hlutur hefur farið jafn langt út í geiminn og Langförull eða Voyager I. sem Bandaríkjamenn skutu á loft í september 1977, rétt á eftir systurfarinu Voyager II.

Hefur Voyager I. lagt að baki liðlega 17 milljarða kílómetra á 33 ára siglingu sinni um geiminn og nálgast útjaðar sólkerfisins. Fjarlægðin er svo mikil að útvarpsbylgjur eru sextán stundir að berast til jarðar.

Vísindamenn segjast merkja það á öreindaflæðinu um geimfarið að það sé að komast að ystu mörkum sólkerfisins, að sögn vefsíðu Jyllandsposten. Öreindirnar eða sólvindarnir koma frá sólinni, flæðið hefur til þessa verið á móti Voyager en er nú á hlið.

Innan við tonn að þyngd

Voyager 1. er um 733 kílógrömm að þyngd og stærðin á við hálfan smábíl, lengstu loftnetin eru þó um 13 metrar. Raforkan í senditækin kemur úr geislavirku plúton-238 og er framleiðslan um 58% af upprunalega aflinu.

Á óvart hefur komið hve vel farið endist en hraðinn á því er um 61 þúsund km á klukkustund. Öll mælitækin í báðum hnöttunum virka enn snurðulaust.

Hópur vísindamanna undir forystu stjörnufræðingsins Carls Sagan fékk það hlutverk að safna saman margvíslegum upplýsingum um jörðina og koma þeim fyrir á gylltum mynd- og hljóðdiski, eintak er í báðum Voyager-förunum. Um er að ræða ljósmyndir af jörðinni og lífverum á henni, vísindagögn, kveðjur frá framkvæmdastjóra Sameinuðu þjóðanna og forseta Bandaríkjanna, einnig hljóð frá hvölum, barnsgrátur, öldugjálfur við strönd og margs konar tónlist.

Hugmyndin var að færi svo að verur af öðrum hnöttum fyndu hnöttinn myndu þær geta fræðst um jarðarbúa. En sumir vöruðu við því að óvinveittar geimverur gætu misnotað upplýsingarnar og gert árás.

Traust smíði
» Upprunalegt hlutverk Voyagers I. og systurhnattarins, Voyagers II., var að rannsaka og taka myndir af Júpiter, Satúrnusi, Úranusi og Neptúnusi.
» Árið 1989 var því verki lokið og var Voyager I. þá sendur lengra út í geiminn.
» Systurfarið var sent á aðra braut og náði minni hraða en er þó komið langt, er nærri 14 milljarða km frá jörðu.