Finna fimm Alzheimergen til viðbótar

Fundist hafa fimm arfberar sem aukið geta hættuna á hrörnunarsjúkdómnum Alzheimer. Frá þessu segir í grein um fjölþjóðlega vísindarannsókn í nýjasta hefti tímaritsins Nature Genetics en meðal höfunda eru vísindamenn Íslenskrar erfðagreiningar. 

Með þessu eru gen sem tengjast Alzheimer-sjúkdómnum orðin 10 en í greininni segir að nýju genin fimm hafi þrenns konar áhrif á starfsemi líkamans. Hugsanlega mætti beina meðhöndlun að þeim en vísindamennirnir segja það ekki unnt í bráð, heldur í fyrsta lagi eftir ein 15 ár.

Í greininni í Nature Genetics segir að ef uppræta mætti áhrif allra genanna 10 myndu líkurnar á því að verða sjúkdómnum að bráð minnka um 60%. Talið er að hann sé að 80% leyti arfborinn.

Fyrsta genið sem tengdist Alzheimer uppgötvaðist fyrir rúmum 17 árum en síðan leið til ársins 2009 að fleiri gen voru uppgötvuð.

Í ofangreindri rannsókn tóku þátt fjöldi vísindastofnana um heim allan. Þar á meðal Íslensk erfðagreining í Reykjavík og læknadeild Háskóla Íslands.

• 3 blogg um fréttina

Bloggað um fréttina

• Ómar Ragnarsson: "Alefling andans og athöfn þörf."
• Arnór Baldvinsson: Myndavíxl
• Jóhann Elíasson: HEILAGRI JÓHÖNNU OG GUNNARSSTAÐA-MÓRA VERÐUR EKKI BJARGAÐ.....