Farsími hugsanlega krabbameinsvaldandi

Geislun frá farsímum getur hugsanlega valdið krabbameini. Þetta er mat Heilbrigðisstofnunar Sameinuðu þjóðanna WHO.

WTO setti í dag farsíma á lista yfir umhverfisþætti sem geta valdið krabbameini. Áður en þessi breyting var gerð hafði stofnunin lýst því yfir að ekkert benti til að geislun frá farsíma gæti stuðlað að því að fólk fengi krabbamein.

Hópur yfir 30 vísindamanna frá 14 löndum hefur rannsakað áhrif geislunar á mannslíkamann. Vísindamennirnir töldu að fram væru komnar nægilegar upplýsingar til að fullyrða að geislun frá farsímum væri mögulega krabbameinsvaldandi.

Þessi niðurstaða þýðir að ekki er búið að gera nægilega miklar rannsóknir á langtímaáhrifum geislunar frá farsímum til að hægt sé að fullyrða að símarnir séu öruggir, en það liggja fyrir nægilega miklar tölfræðilegar upplýsingar um tengsl farsíma og krabbameins að ástæða sé til að benda farsímanotendum á hættuna.