Gagnrýnir mannaðar geimferðir

Hinn nýskipaði yfirmaður rússnesku geimferðastofnunarinnar, Vladimír Popovkin, viðurkenndi að of mikil áhersla hafi verið lögð á mannaðar geimferðir að undanförnu og að þær hafi skilað takmörkuðum árangri. 

Popovkin tók við embætti fyrr á þessu ári og lét hann ummælin falla á einum af sínum fyrstu blaðamannafundum.

Hann segir nánast óásættanlegt að nær helmingur alls fjármagns rússnesku geimferðastofnunarinnar renni í að senda mann á sporbraut um jörðu.

„Ef það svarar kostnaði og gefur jákvæða niðurstöðu að senda mann út í geim, þá er það þess virði. En ef einstaklingurinn vill einungis vera á sporbraut um jörðu, þá sé ég ekki jákvæðu hliðarnar við það. Það verður að skila einhverju af sér að senda mann út í geim,“ sagði Popovkin.

Eftir að Bandaríkjamenn lögðu af geimferjur sínar nýverið, eru Rússar eina þjóðin sem býr yfir tækni til að senda geimfara til alþjóðlegu geimstöðvarinnar.

• 1 blogg um fréttina

Bloggað um fréttina

• Hjörleifur Harðarson: bara á sporbraut ... ég væri sko alveg til í …