Geta nú bætt við erfðaefni þráðorms

Vísindamönnum við rannsóknarstofu Cambridge-háskóla í sameindalíffræði hefur tekist að auka við erfðaefni þráðormsins Caenorhabditis elegans og þannig eiga við erfðaefni lifandi veru.

Breska útvarpið, BBC, segir frá þessari uppgötvun en á vef þess kemur fram að 21. amínósýrunni hafi verið bætt við erfðaefnið. Sú sé ný af nálinni og bætist við þær 20 amínósýrur sem myndi grundvöll erfðaefnis og þar með lífsins.

Byggingareiningar lífsins

Amínósýrur smíða prótein sem eru nauðsynleg lífverum. Með því að bæta við einni amínósýru er því verið að hafa áhrif á starfsemi lífveru og þar með breyta henni.

Gerð er grein fyrir niðurstöðunum í fræðiritinu Journal of the American Chemical Society en þar kemur m.a. fram að hver fruma í þráðormunum breyttu framleiði nú prótein sem veldur því að þeir glóa í útfjólubláu ljósi.

Uppgötvunin þykir opna ýmsa möguleika, m.a. í læknisfræði, en tíminn á eftir að leiða í ljós hvert notagildið verður.