Alþjóðaveðurfræðistofnunin segir að styrkur koltvísýrings í lofthjúpi jarðar hafi verið 400 milljónarhlutar að meðaltali á síðasta ári. Það hefur áður gerst í einstökum mánuðum á vissum svæðum en aldrei að ársmeðaltali. Ekki hefur verið eins mikið af lofttegundinni í lofthjúpnum í milljónir ára. 

Styrkur gróðurhúsalofttegundarinnar koltvísýrings hefur stóraukist undanfarna áratugi vegna bruna manna á jarðefnaeldsneyti og veldur loftslagsbreytingum á jörðinni. Alþjóðaveðurfræðistofnunin birti í dag nýjustu skýrslu sína um gróðurhúsalofttegundir og sagði að styrkurinn hefði aftur náð methæðum á þessu ári.

Stofnunin spáir því að ársmeðaltalið verði yfir 400 milljónarhlutum „í margar kynslóðir“.

Hluti af ástæðunni fyrir auknum styrk koltvísýrings var veðurfyrirbrigðið El niño. Það olli þurrki á sumum hitabeltissvæðum og dró úr getu skóga og gróðurs til þess að taka upp koltvísýring úr andrúmsloftinu.

Petteri Taalas, forstöðumaður Alþjóðaveðurfræðistofnunarinnar, segir að ekki sé ástæða til að sofa á verðinum þrátt fyrir að El niño hafi nú slotað.

„El niño er horfinn. Loftslagsbreytingar eru það ekki,“ segir Taalas.

Tengdar fréttir

Loftslagsvá

„Kæra fullorðna fólk“

• „Börn eru að upplifa holskeflu breytinga“
• Yfir 1.000 jöklar bráðnað í landinu
• „Við erum á leið til glötunar“
• Berjast áfram gegn hlýnun þrátt fyrir sigur Trumps

» Fleiri tengdar fréttir

• 1 blogg um fréttina

Bloggað um fréttina

• Finnur Hrafn Jónsson: Ljósmynd af ósýnilegri lofttegund