ESB talið hafa bælt skýrslu um netræningja

Framkvæmdastjórn Evrópusambandsins greiddi um 55 milljónir fyrir rannsókn á því hvernig ólöglegt niðurhal hafi áhrif á sölu höfundarvarðar tónlistar og kvikmynda en hefur aldrei birt skýrsluna, mögulega vegna þess að niðurstaðan var sú að engin sönnun sé fyrir því að ólöglegt niðurhal sé stórt vandamál. Gizmodo greinir frá. 

Hollenska fyrirtækið Ecory fékk þóknun fyrir að rannsaka áhrif ólöglegs niðurhals (piracy) yfir nokkurra mánaða tímabil sem leiddi til 304 blaðsíðna skýslu sem afhent var ESB í maí 2015. Niðurstaða skýrslunnar var að almennt séu ekki til staðar tölfræðilegar sannanir sem sýnir fram á að brot gegn höfundarrétti á netinu skaði sölu. Það þýði þó ekki endilega að ólöglegt niðurhal hafi engin áhrif heldur einungis að tölfræðileg rannsókn sanni ekki með nægilri vissu að ólöglegt niðurhald hafi áhrif.

Þá var komist að þeirri niðurstöðu í skýrslunni að ólöglegt niðurhal og streymi geti í raun aukið sölu á tölvuleikjum, en hafi neikvæðustu áhrifin á vinsælar kvikmyndir (blockbusters). Skýrslan hefur litið dagsins ljós vegna þess að Julia Reda, meðlimur þýska pírata, birti skýrsluna á bloggsíðu sinni eftir að hún fékk eintak af henni fyrir tilstuðlan upplýsingalaga. 

• Blogga um frétt