Tækni & vísindi | mbl | 16.10.2017 | 11:53 | Uppfært 19:43

Nýr galli í þráðlausum nettengingum

„Key Reinstallation Attacks“ er ný tegund galla í þráðlausum nettengingum. AFP

„Krack“ eða „Key Reinstallation Attacks“ er ný tegund galla í þráðlausum nettengingum sem rannsakendur við háskóla í Belgíu greindu nýlega frá.

Um er að ræða galla sem gerir það að verkum að hægt er að lesa dulkóðuð samskipti á þráðlausu neti.

Gallann er aðallega að finna í staðfestingarbúnaði sem inniheldur talnarunu sem notaður er til að tryggja öryggi þráðlausra tenginga. Snjalltæki sem nota Android 6.0 stýrikerfi eru sérstaklega viðkvæm fyrir gallanum.

Starfsmenn Google eru meðvitaðir um gallann að sögn BBC. „Við erum að vinna að því að bæta þau tæki sem hafa orðið fyrir gallanum og verða þau klár á næstu vikum,“ segir talsmaður Google.

Talið er að gallinn geti haft áhrif á allar nettengingar, hvort sem um er að ræða litla nettengingar í heimahúsi eða öflugari tengingar hjá stórum fyrirtækjum.

Gallinn var uppgötvaður af rannsóknarteymi við háskólann í Leuven. Teymisstjórinn, Mathy Vanhoef, greinir frá niðurstöðum teymisins í skýrslu þar sem kemur meðal annars fram að gallinn kemst í gegnum svokallað „handabands“ öryggiskerfi sem hefur hingað til haldið vel, en kerfið er 14 ára gamalt.

Hér má nálgast frekari upplýsingar um Krack gallann.