Tækni & vísindi | mbl | 24.9.2018 | 8:33 | Uppfært 25.9.2018 6:30

Almenningur hvattur til að taka þátt

Katrín Jakobsdóttir forsætisráðherra. mbl.is/Kristinn Magnússon

Vísinda- og tækniráð Íslands efnir til opins samráðs við almenning og hagsmunaaðila um skilgreiningu þeirra framtíðaráskorana sem vísindi og rannsóknir ættu markvisst að takast á við.

Markmið þess er að fá fram fjölbreytt sjónarmið og ábendingar sem geta orðið til að efla forgangsröðun fjárfestinga í rannsóknum og nýsköpun hér á landi. Á grundvelli gagna úr samráðinu verða skilgreind þrjú til fimm áherslusvið og þverfaglegt samstarf innan þeirra eflt með þátttöku háskóla, rannsóknarstofnana og fyrirtækja, að því er segir í tilkynningu.

Vísinda- og tækniráð hvetur alla áhugasama til að taka þátt með því að svara stuttri netkönnun á síðunni www.samfelagslegaraskoranir.is fyrir 7. október og setja þannig mark sitt á framtíðina.

Háskóli Íslands. Þverfaglegt samstarf verður eflt með þátttöku háskóla, rannsóknarstofnana og fyrirtækja. mbl.is/Ómar Óskarsson

„Við stöndum frammi fyrir ýmsum hnattrænum áskorunum þegar kemur að umhverfis- og loftslagsmálum og heilsu-, orku- og öryggismálum svo dæmi séu tekin. Sömuleiðis hlýt ég að nefna þá tæknibyltingu sem við stöndum frammi fyrir. Þátttaka alls almennings er lykilatriði til að samfélaginu farnist sem best í að mæta þessum áskorunum,“ segir Katrín Jakobsdóttir forsætisráðherra í tilkynningunni.

Forsætisráðherra er formaður ráðsins en þar sitja einnig mennta- og menningarmálaráðherra, fjármála- og efnahagsráðherra og ferðamála-, iðnaðar- og nýsköpunarráðherra.

Fjöldi fólks á Ingólfstorgi í sumar. Almenningur er hvattur til að taka þátt með því að svara stuttri netkönnun. mbl.is/Hari

Vísinda- og tækniráð mótar opinbera stefnu í vísindum og tækni á Íslandi og hefur það hlutverk að efla vísindarannsóknir, vísindamenntun og tækniþróun í því skyni að treysta stoðir íslensks samfélags. Í stefnu Vísinda- og tækniráðs fyrir árin 2017-2019 er kveðið á um mikilvægi þess að niðurstöður vísindastarfs, nýsköpun og tækni nýtist öllu samfélaginu og að stuðla þurfi að skilningi og áhuga almennings á rannsóknum og nýsköpun.