Bilun olli Teslu-eigendum vandræðum

Teslu-eigendur hafa greint frá því á samfélagsmiðlum að þeir hafi átt í vandræðum með að nota bílana sína í kjölfar tölvubilunar. 

Tugir hafa birt færslur á samfélagsmiðlum þar sem þeir greina frá því að hafa fengið skilaboð um bilun í Teslu-snjallsímaforritum sínum sem koma í veg fyrir að þeir gætu tengst bifreiðunum. 

Elon Musk, forstjóri Tesla, svaraði einni kvörtun frá ökumanni í Suður-Kóreu persónulega á Twitter er hann skrifaði: „Kanna málið“. Musk sagði skömmu síðar að appið væri að detta aftur í lag á netinu. 

AFP

Eigendurnir nota Teslu-appið sem lykil til að aflæsa og gangsetja bílana sína, að því er segir á vef BBC. 

Teslu-eigendur birtu fjölmargar kvartanir á vefnum þar sem þeir greindu frá því að þeir gætu ekki notað bílana sína. 

„Ég sit fastur í um klukkustundarfjarlægð frá heimili mínu þar sem ég vanalega nota símann minn til að ræsa bílinn,“ segir í færslu sem einn eigandi birti á Twitter.

Um 500 notendur greindu frá því að appið hefði bilað um kl. 16:40 að bandarískum austurstrandartíma í gær (eða um kl. 21:40 í gærkvöldið að íslenskum tíma), skv. vefsíðunni DownDetector sem greinir frá slíkum bilunum. Fimm klukkustundum síðar þá hafði slíkum kvörtunum fækkað niður í um 60. 

„Afsakið þetta, en við munum grípa til viðeigandi ráðstafana til að koma í veg fyrir að þetta endurtaki sig,“ sagði Musk ennfremur á Twitter. 

• 1 blogg um fréttina

Bloggað um fréttina

• Ómar Ragnarsson: Er gamli lykillinn ennþá skástur? "Tölvustýrt "Dekkjaþrýstingseftirlitsstjórnkerfi.""