Nauðsynlegt að ljúka Icesave
Setja bókamerki
Árni Páll Árnason, efnahags- og viðskiptaráðherra, segir nauðsynlegt að ljúka Icesave-samningum þar sem það komi í veg fyrir að orkufyrirtækin geti fjármagnað sig. Stefnt sé að því að blása til stórátaks til hjálpar fyrirtækjunum í landinu. Þetta kom fram í óundurbúnum fyrirspurnartíma sem nú stendur yfir á Alþingi.
Tryggvi Þór Herbertsson, Sjálfstæðisflokki, spurði Árna Pál út í tölur sem birtar voru fyrir helgi varðandi samdrátt í landsframleiðslu og vísaði til ræðu Jóhönnu Sigurðardóttur við setningu þingsins um hagvöxt í sex mánuði.
Árni Páll segir nauðsynlegt að ljúka Icesave málinu. Það komi í veg fyrir að hægt sé að tryggja hér atvinnutækifæri og koma í veg fyrir fjárfestingar.
Hann segist leggja áherslu á
að blása til stórátaks til að minnka skuldavanda fyrirtækja. Það þurfi
að vinna hratt með bankakerfinu. Nauðsynlegt sé að ljúka Icesave. Það er
sama hvaða orkufyrirtæki er þau eru í vandræðum með fjármögnun vegna
þess að ekki hafi verið gengið frá Icesave-samkomulagi.
Jón Gunnarsson, Sjálfstæðisflokki, kvartaði yfir því að enn einu sinni ætti að hefja Icesave-sönginn og að það eigi að kenna Icesave um það sem miður fer. Frekar ætti að líta á störf ríkisstjórnarinnar þar sé skýringuna að finna á því hve erfið staðan er.
