Umræðan kom Sigmundi á óvart

Laxveiðisumarið hófst í morgun þegar veiðimenn tóku að kasta flugum sínum í Norðurá í Borgarfirði og Blöndu.

Fjölmargir fjölmiðlamenn höfðu safnast saman neðan við Laxfoss í Norðurá þegar Sigmundur Davíð Gunnlaugsson forsætisráðherra og Bjarni Benediktsson fjármálaráðherra gengu niður að ánni rétt fyrir klukkan sjö, en bændur við ána og Einar Sigfússon sölustjóri hennar höfðu boðið ráðherrunum að taka fyrstu köstin og opna þannig laxveiðitímabilið formlega.

Þátttaka ráðherranna hefur vakið athygli og umræður og eftir að Sigmundur Davíð hafði tekið fyrstu köstin af bakkanum viðurkenndi hann í samtali við blaðamann að umræðurnar hefðu komið honum nokkuð á óvart.

„Að bændur hér skyldu bjóða okkur formlega að koma og opna veiðisumarið með því að taka nokkur köst, skyldi verða að stórmáli og duga til þess að vekja forvera minn af værum blundi, það kom mér satt best að segja á óvart,“ sagði hann.

Um klukkan hálf átta tók lax flugu Bjarna á Brotinu og landaði hann skömmu síðar nýgenginni 78 cm langri hrygnu.

• 3 blogg um fréttina

Bloggað um fréttina

• Vésteinn Valgarðsson: Tóku þeir kast?
• Wilhelm Emilsson: Að vera í vöðlum
• Páll Vilhjálmsson: Fordæma fyrst, rökin koma síðar eða alls ekki

Seinustu hundraðkallar sumarsins