Fengu marga hnúðlaxa í Hrútu og Hauku

Fjölmargir hnúðlaxar hafa veiðst upp á síðkastið. Þannig fréttu Sporðaköst af tveimur hollum, í Hrútafjarðará og Haukadalsá þar sem uppistaða veiðinnar var hnúðlax. Fyrra hollið var í Hrútafjarðará og bókuðu menn í fyrradag átta hnúðlaxa í neðstu hyljunum, Dumbafljóti, Maríubakka, Staðartunguhyl og Háeyrarhyl. Fiskarnir eru nákvæmlega skráðir í veiðibókina og eru þeir á bilinu 42 til 60 sentímetra. Flestir þeirra tóku Sunray shadow.

Í holli sem nú er að ljúka störfum í Haukadalsá höfðu veiðst fleiri hnúðlaxar en hefðbundnir laxar. Þannig var búið að landa sjö hnúðlöxum en fimm hefðbundnum.

Arnar Már Baldvinsson er einn af þeim sem er að veiða Haukadalsá. Hann sagði engu líkara en að hnúðlaxinn væri að ganga í ána núna. 

Hnúðlaxahrygna úr Haukadalsá. Jón Valberg fékk hana en samtals voru þeir félagar í gær komnir með sjö hnúðlaxa og fimm venjulega. Ljósmynd/Arnar Már

Það er ljóst að í báðum þessum ám er töluvert magn gengið af hnúðlaxi. Hann heldur sig gjarnan í torfum og ljóst að veiðimenn veiða ekki nema brot af þeim fiski sem gengur, með hefðbundnum aðferðum.

Athyglisvert er að sjá að í Hrútafirði eru komnir á land 21 hnúðlax á móti 74 löxum. Er það með hærra hlutfalli sem sést hefur í laxveiðiá í sumar. Tuttugu hnúðlaxar hafa veiðst í Hofsá í sumar, samkvæmt veiðibók. 21 hefur veiðst í Miðfjarðará í Bakkafirði. Nánast allar ár á landinu hafa bókað hnúðlaxa og því ljóst að stefnir í hrygningu hjá þessum framandi gesti á landsvísu.

Rekstraraðilar í mörgum ám huga nú að aðgerðum til að sporna við hnúðlaxinum. Uppi eru hugmyndir um að nota dróna við finna torfur af hnúðlaxi og fara síðan með ádráttarnet og reyna að ná þessum fiskum. 

• 1 blogg um fréttina

Bloggað um fréttina

• Örn Gunnlaugsson: Eftirlæti prikveiðimanna.

Seinustu hundraðkallar sumarsins