Airwaves bjór sem hentar vel til dagdrykkju

Bruggmeistari Bryggjunnar, Bergur Gunnarsson, hefur bruggað sérstakan Airwaves-bjór í tilefni hátíðarinnar sem hefst í vikunni. Bjórinn er af tegundinni Session IPA og nefnist Session IPAirwaves. Einnig verður sérblandaður kokkteill reiddur fram á barnum og Airwaves-matseðill settur í loftið, en Bryggjan er „off venue“ staður á Airwawes og býður upp á tónleika meðan á hátíðinni stendur. 

„Bryggjan Session IPAirwaves hentar einstaklega vel til dagdrykkju. Um er að ræða ríflega humlaðan session IPA, í kringum 4,6%. Session IPA er bjórstíll sem er alltaf fremur lágur í áfengisprósentu en næstum því með sama magni af humlum og í venjulegum IPA,“ segir Bergur Gunnarsson bruggmeistari, sem stendur í ströngu um þessar mundir, en von er á enn öðrum nýjum bjór frá Bryggjunni Brugghúsi á næstu dögum.

„Airwawes-bjórinn er bruggaður með höfrum, sem eykur munnfylli bjórsins, hann er humlaður með Columbus og Mosaic og þurrhumlaður með Citra, Mosaic og Centennial, sem gefur bjórnum ávaxta- og sítruskeim,“ segir Bergur ánægður með útkomuna og segir gott útlit fyrir dagdrykkju næstu daga.

• Blogga um frétt