Matur | mbl | 12.9.2023 | 6:00 | Uppfært 10:38

Hafragrautur sem bragðast eins og kaffikaka

Hafragrautur í formi köku er dásamlegur morgunmatur og brýtur upp hverdagsleikann. Ljósmynd/Berglind Guðmunds

Stundum má fá sér köku í morgunmat til tilbreytingar og kaka þarf alls ekki að vera óholl. Hafragrautur í kökuformi er tilvalinn í morgunmat og bragðast hreinlega eins og kaffikaka. Þessi dásemdar uppskrift af hafragraut í kökuformi kemur úr smiðju Berglindar Guðmunds hjá Gulur, rauður, grænn og salt og er alltaf jafngóður.

Hafragrautur í kökuformi

1 banani
480 ml möndlumjólk (eða mjólk að eigin vali)
60 ml hlynsíróp
1 tsk. vanilla
400 g OTA haframjöl
½ tsk. lyftiduft
1 tsk. kanill
¼ tsk. múskat
¼ tsk. salt
hafra- og hnetukurl
65 g pekanhnetur
60 g sykur
2 msk. hveiti
½ tsk. kanill
4 msk. fljótandi kókosolía

Aðferð:

Byrjið á að hita ofninn í 175°C hita.
Blandið öllum hráefnum vel saman og látið í smurt ofnfast mót.
Gerið mulninginn með því að láta haframjöl og pekanhnetur í matvinnsluvél sem snýst.
Bætið hinum hráefnunum saman við.
Stráið yfir kökuna.
Látið inn í heitan ofn í um það bil 30 mínútur.